КАДЕ И ДА СЕ СВРТИШ, ИЗЛЕГУВААТ СКРИЕНИ ТРОШОЦИ Владата го избира помалото зло за да избегне арбитража со „Бехтел и Енка“

Единствено решение е да се користи варовникот од друго место, но тоа ќе изнесува дополнителни 18 милиони евра, рече премиерот Христијан Мицкоски денеска во врска со протестот на жителите од прилепските Ореовец, Крстец и Плетвар кои се против отворање на рударскиот коп во близина на селото Ореовец од страна на фирмата „Бехтел и Енка“.

– Тоа се проблеми наследени од минатото. Претходната влада презела обврска да ги реши имотно-правните обврски до средината на минатата година, во спротивно, месечно треба да плаќаме три милиони евра пенали. До сега требаше 36 милиони евра само по основ на пенали да плаќаме. Јас сочувствувам со сопствениците на населбата и сакаме да помогнеме. Досега единствено решение е да се користи варовникот од друго место, но тоа значи дополнителни 18 милиони евра – рече тој.

Според Мицкоски, мора да се најде решение затоа што следниот чекор е арбитража, а доколку се изгуби спорот, ќе треба да се платат многу пари.

– Потрошиле 300 милиони евра без никаков прогрес. До вчера протестираа во местото во близина на Гостивар, денеска протестираат во Прилеп, ќе продолжат овие протести. Ние сме свесни дека тоа ќе се случи поради тоа што овој проект треба да се реализира затоа што ако не се реализира одиме на арбитража. На арбитража штетата ќе биде огромна – рече Мицкоски.

Утринава беше блокиран патот од Прилеп кон Плетвар поради протест. Активисти од Прилеп изразија незадоволство од отворањето на рударски коп кај Ореовец. Протестот беше одржан на местото Заполошки Мост од 6:30 до 9:00 часот, а сообраќајот во тој период беше во прекин.