ГО НОСЕЛ НА СТРЕЛИШТЕ?! Новинарот Фуркан Салиу со нова верзија за тоа како се нашол неговиот пиштол во автомобилот

Секој викенд одел на стрелиште. Затоа пиштолот бил во неговиот автомобил и за време на фудбалскиот натпревар во Долно Коњаре, кадешто се случил инцидентот, по кој новинарот Фуркан Салиу од Порталикс беше приведен во полициска станица, а по неколку часа беше пуштен на слобода.

Нејасно е зошто дури сега Салиу го спомнува стрелиштето. Во изјава за ТВ Сител, на прашањето зошто носел со себе пиштол, новинарот изјави дека секој ден оди на стрелиште и дека тоа го планирал и по фудбалскиот меч во Долно Коњаре.

– Преку адвокат уште утре ќе поднесам поднесок до внатрешната контрола на МВР, особено за делот на отворањето на моето возило без мое присуство и без судски налог. Како знаеле дека е тоа моето возило? Како знаеле дека јас имам пиштол и дека секој викенд одам на стрелиште? Доказ дека одам на стрелиште може да се најде во стрелиштето каде се запишува и потпишува секој поединец. Го искористија моментот за да ми „вратат“ за прилозите кои што ги објавив на Порталикс, а кои се однесуваат на лажните анкети – изјави Салиу за ТВ Сител.

Да потсетиме. Фуркан Салиу беше приведен под сомнение дека нападнал полицаец од Единицата за брзо распоредување, а во неговото возило бил пронајде пиштол, за кој ден по инцидентиот е соопштено дека бил со рамка полна со куршуми.

Министерот за внатрешни работи Панче Тошковски на денешниот прес се соочи со Фуркан Салиу, а на тврдењето на новинарот дека не нападнал никого, министерот му рече:

– Лажете. Јас друго видов на камерите!

Јавноста е во очекување на снимките од инцидентот, а за начинот на кој Салиу го чувал својот пиштол веќе е јасно – огненото оружје не смеело да се чува и да се транспортира на таков начин, макар и на стрелиште.