ГЛАСАЈТЕ ЗА СУБВЕНЦИИТЕ ОД 110 МИЛИОНИ ДЕНАРИ, ЌЕ НЕМА ЈАВЕН ПРЕВОЗ! Директорот на ЈСП очајнички ги моли скопските советници

Директорот на ЈСП „Скопје“ Крсте Петревски на денешната деветта вонредна седница пред советниците повторно ги образложи трошоците што ги има јавното претпријатие, пред гласањето за негово субвенционирање со 110 милиони денари.

– Најмногу пари одат на нафта – 480 милиони денари до крајот на годината, за антифриз, масло, мазива одат 16 милиони, за електрична енергија 20-22 милиони денари, за парно – 130.000 денари, за метан – 110 милиони денари, за мобилни и интернет речиси 2 милиони денари, има и трошоци за резервни делови, ХТЗ опрема, алат, автогуми, повремени услуги на Агенцијате за вработување – 71 милиони. Дополнително, дека годишно ЈСП плаќа 110 милиони за новите автобуси МАН, како и два други кредита од британскиот и јапонскиот клуб – рече Петревски.

Тој уште еднаш ги замоли сите советници да ги изгласаат потребните субвенции, бидејќи, како што кажа, се работи за платите на вработените, а со тоа ќе биде доведен во знак прашање и јавниот сообраќај.

– Мора да помогнеме за јавниот превоз да се одржи во кондиција. Доколку не ја донесеме одлуката ќе предизвикаме застој во јавниот превоз. Чесните вработени во претпријатието ќе останат без плата – рече Петревски.

Директорот на ЈСП „Скопје“ Крсте Петрески од говорницата ги негираше поставените прашања од советникот на Левица, Амар Мециновиќ.

– Информациите дека шоферите си заминуваат, не се точни. Еден си оди поради остварување на пензија, а другиот поради отказ. Ние распишавме конкурс при што беа вработени 36 возачи, а оваа година си заминаа 57 поради пензија. За да функционира ЈСП потребни ни се возачи, но поради лимитираните средства, размислуваме дали тоа да го направиме оваа година – рече директорот Петрески.

Тој ги негираше информациите на советникот Мециновиќ дека на возачите на ЈСП не им се исплаќаат дополнителните часови, туку им се даваат слободни денови кои потоа не можат да ги искористат.

– Деновите за користење на прекувремени часови во слободни денови се влече уште од времето на короната. За овој проблем јас имам интензивни разговори со трите репрезентативни синдикати и бараме решение – додаде Петрески.

За вработените во ЈСП на кои им истекоа договорите, директорот рече дека станува збор за 27 лица, а не за 40-50, а како претпријатие биле принудени за таков чекор.

– Нам ни се потребни возачи, а немаме средства за тоа – рече Петрески.