УЧЕСТВУВАЛ И КИЧЕЕЦ Еден загина, седум се повредени во сообраќајка кај Стража

Во тешката сообраќајна несреќа што попладнево се случила кај Стража на патот Маврово – Кичево учествувал и Зоран Милески-Кичеец, осуден во случајот „Рекет“, објави порталот МКД.мк.

МИА објави дека во СВР Тетово било пријавено дека на магистралниот пат Гостивар-Кичево, во близина на Новоселските гробишта, денеска во 15.30 часот се случила сообраќајна несреќа. Во неа учествувале три моторни возила: џип „мерцедес”, патничко возило „бмв” и камионет.

Од повредите здобиени при сударот едно лице од камионетот починало на местото на несреќата, а седум лица се пренесени во гостиварската Општа болница „Ферид Мурад“ за укажување на лекарска помош.

Засега нема информации како дошло до несреќата и што ја предизвикало.

Во моментов јавен обвинител и екипа од ОВР Гостивар вршат увид.

Од СВР Тетово посочуваат дека денеска во рамки на акцијата за контрола на брзина на сообраќајот во полошкиот регион, биле изречени 86 мерки.