Напад со нож кај ексзградата на „Шарли Ебдо“, тројца повредени, еден потешко

Утрово во Париз кај поранешните простории на Шарли Ебдо, местото на нападот од 2015 година, се случи напад со нож.

Три лица се повредени, а еден е во тешка состојба, јавува Le Parisien.

Меѓу повредените е вработен на продукциска фирма, сосед на поранешните простории на сатиричниот неделник и жена од друга фирма.

Причините за нападот се уште се непознати.

Полицијата ги замолува граѓаните да го избегнуваат тоа подрачје поради полициската интервенција која е во тек. На местото на нападот кружи и хеликоптер.

Објавена е и информација за потенцијален втор напаѓач, јавува Le Parisien.

Париската полиција објавила дека е уапсен маж кој се сомничи за нападот со нож.

Во Париз во тек е судењето на лицата кои помагале на напаѓачите на редакцијата на сатиричниот неделник Шарли Ебдо. Во терористичкиот напад во 2015 година двајца исламисти, инаку браќа, убија 12 и ранија 11 лица.