Лани се отворени 9 нови предмети за корупција со висок профил
Владата информира дека биле подигнати вкупно 10 обвинителни акти, а донесени се 10 пресуди, од кои една пресуда е ослободителна, се појаснува во соопштението од денешната владина седница.
Владата на денешната седница оценла дека лани е постигнат добар напредок во областа борба против корупцијата, откако ја разледала Информацијата со статистички податоци за кривични предмети од областа Корупција за 2019 година.
Како што е соопштено, ваквата оценка произлегува од консолидирањето на евиденцијата на истраги, обвиненијата и судења за случаи на корупција од висок профил и со измени во законодавството.
Според статистичките податоци, лани биле оформени вкупно 41 нови предмети за кривични дела од областа корупција, во кој број се вклучени и предметите за случаи на корупција од висок профил.
Во 2019 година, во предмети за кривични дела од областа корупција биле издадени 17 наредби за спроведувања истрага и доминира бројот на евидентирани предмети за случаи на корупција во јавни набавки.
Истата година, се евидентирани вкупно девет нови предмети за случаи на корупција од висок профил и сите тие во текот на 2019 година се статус „во тек“. Исто така биле подигнати вкупно 10 обвинителни акти, а донесени се 10 пресуди, од кои една пресуда е ослободителна, се појаснува во соопштението од денешната владина седница.
Владата на денешната седница го задолжила Министерството за правда, во рамки на Работната група за преглед и ажурирање на методологијата за релевантен статистички систем за мониторинг на анти-корупциската политика, да продолжи да презема активности за редовно користење на Системот за собирање и обработка на статистички податоци за следење на предметите за случаите на корупција кои како што се вели во соопштението, претставуваат значаен сегмент во градењето на анти-корупциската политика и следењето на нејзината ефективност.
Преземањето активности за развој на систем за следење на предметите за случаите на корупција и генерирање статистички извештаи за мониторинг на анти-корупциската политика е во согласност со Десетте принципи за унапредување на борбата против корупцијата во земјите кои пристапуваат, земјите кандидати за членки на Европската унија и други трети земји, стои во соопштението од владината прес-служба и се додава дека статистичките податоци кои ги собира Министерството за правда се користат за ажурирање на материјалот со кој се известува Европската комисија, но и да послужат за натамошна анализа на состојбите со ефикасноста правосудните и другите органи во постапувањето по предметите за случаите на корупција.