АНТИКОРУПЦИСКА ОТКРИЛА 11 МОЖНИ СЛУЧАИ НА КОРУПЦИЈА Предметите се предадени во Обвинителство, поднесени се и 400 прекршочни пријави
Бројот на предмети значително е зголемен, а истовремено, значително е интензивирана и активноста на Комисијата во однос на разгледувањето на овие предмети и донесувањето одлуки – рече претседателот на комисијата Адем Чучуљ во гостување на ТВ „Шења“.
Државната комисија за спречување на корупцијата заклучно со октомври отворила околу 800 предмети за испитување можни случаи на прекршувања на одредбите утврдени во Законот за спречување на корупцијата и судирот на интереси – изјави претседателот на Комисијата Адем Чучуљ во гостување на ТВ „Шења“.
Тој истакна дека Комисијата ги засилила своите напори во разгледувањето на предметите и донесувањето одлуки, при што дел од овие случаи се доставени до Јавното обвинителство на натамошно постапување.
– Имаме отворено над 800 предмети, сите до месец октомври. Бројот на предмети значително е зголемен, а истовремено, значително е интензивирана и активноста на Комисијата во однос на разгледувањето на овие предмети и донесувањето одлуки.
Веќе имаме донесено 720 до 730 одлуки, кои се обработени и објавени на нашата веб-страница. Понатаму, имаме поднесено повеќе од 400 барања за поведување прекршочна постапка поради прекршување на одредбите утврдени во Законот за спречување на корупцијата и судирот на интереси
Дополнително, до Јавното обвинителство упативме 11 предмети – случаи каде што утврдивме сомневања за криминални дејствија – како и уште околу 10 други предмети, со цел Обвинителството да преземе соодветни мерки и да утврди дали, всушност, е сторено кривично дело – изјави Чучуљ.