САД ја купиле глобалната залиха на лекот „ремдесивир“

САД ја купиле целата глобална залиха на лекот „ремдесивир“, кој се покажа како ефикасен во лекувањето на ковид-19, пишува британскиот Гардијан,  наведувајќи дека во наредните три месеци, нема да има ниту една достапна доза за ниту една друга држава во светот.

Експерти и активисти ширум светот се загрижени за ваквиот потег на американската администрација и стравуваат дека истото може да се случи и ако се открие или произведе првата ефикасна вакцина против коронавирусот.

– Тие во моментов имаат пристап до речиси сите залихи на „ремдесивир“, а на Европа не ѝ остана ништо – рече д-р Ендрју Хил, научник од Универзитетот Ливерпул.

Инаку, „ремдесивир“ е првиот лек одобрен од Американската администрација за храна и лекови (ФДА) за употреба во лекувањето на заразените со коронавирус.

– Претседателот Доналд Трамп направи одличен договор со кој на Американците им осигура први да го имаат лекот одобрен за лекување на болеста предизвикана од коронавирусот. Колку што е можно, ние сакаме да му обезбедиме на секој американски пациент на кој му е потребен „ремдесивир“ да го добие тој лек – порача американскиот министер за здравство Алекс Азар.