Трет ден во Косово регистрирани повеќе излекувани од заболени од ковид-19
Во лабораторија за молекуларна микробилогија досега се тестирани примероците на вкупно 7.180 лица за кои постоело сомневање дека се можни носители на новиот коронавирус.
Институтот за јавно здравство на Косово (ИШПК) објави дека во текот на вчерашниот ден во земјата се потврдени 17 нови случаи на лица кои, по тестирањата два дена едноподруго, согласно методите на Светската здравствена организација, резултираа излекувани од Ковид-19, со што бројката на тие кои ја пребродиле болеста се зголеми на 249.
Како што јави дописникот на МИА од Приштина, ова е трет ден по ред како во земјата има поголем број на излекувани одошто заболени од новиот коронавирус, со оглед дека од вчера извршените 225 тестирања, како новозаразени резултираа девет лица.
Вкупната бројка на заразени во Косово од појавата на епидемијата, заклучно со вчерашниот ден, изнесува 799. Четворица од новите заболени се од општина Призрен, тројца од Малишево и по еден од Сува Река и Ораховац.
Според соопштението на ИШПК, во неговата Лабораторија за молекуларна микробилогија досега се тестирани примероците на вкупно 7.180 лица за кои постоело сомневање дека се можни носители на новиот коронавирус.
Вчера, како и во вторникот, во Косово не е евидентирана ниедна нова жртва на Ковид-19, така што вкупната бројка на починати од заразата останува22.