📽️ ВУЧИЌ ОД ШОФЕР СТАНА КЕЛНЕР, НА МЕНИТО СЕ ПЛАТИ, АВТОПАТИ… „НАТО? НАТО немаме, ама има мир“
Доскорешниот претеседател на Србија ја продолжи изборната кампања со нова улога, откако претходно самиот седна зад воланот и тргна меѓу граѓаните. Сега како келнер ги запишува „нарачките“ на едно семејство, од повисоки плати и автопатишта до односите со Русија, Косово и членството во ЕУ и НАТО.
Од шофер зад воланот до келнер со тефтер во раката, Александар Вучиќ ја продолжи кампањата со уште еден режиран предизборен спот. Овојпат на масата не се нарачуваат јадења, туку автопатишта, повисоки плати и пензии, нови породилишта, бесплатно образование и политички одлуки за иднината на Србија.
Првата „нарачка“ се автопатишта, а потоа списокот брзо преминува од животниот стандард кон големите политички прашања.
– Да не воведуваме санкции кон Русија и да ги зачуваме Косово и Метохија – вели постариот член на семејството.
Следуваат повисоки плати и пензии и нови породилишта, но една од нарачките е сосема поинаква.
– Па, Вучиќ да си замине – вели момчето на масата.
Таткото веднаш ја пренасочува неговата желба.
– Нему дајте му бесплатно образование.
Политичкото „мени“ продолжува кога младата жена бара Србија да стане членка на Европската Унија и НАТО.
– НАТО го немаме, но имаме мир и стабилност – одговара Вучиќ.
– Тоа ми одговара – возвраќа таа.
View this post on Instagram
На крајот стигнува и прашањето што во ресторан обично го затвора ручекот.
– А што би сакале за десерт?
Таткото овојпат нарачува стабилен курс на динарот.
– Договорено – одговара Вучиќ.
Спотот завршува со коментарот на бабата дека е „добар човек“.
Новата улога следува по претходната снимка од кампањата во која Вучиќ самиот возеше кон Велика Плана, со Тома Здравковиќ на радио, претставувајќи се истовремено како шофер и „народен трибун“. По пат застана на Шалиначкото Езеро, појадуваше со рибари и покажа дека извадил дозвола за риболов.
Вучиќ претходно најави дека во кампањата ќе патува со сопствен автомобил и ќе настапува како „обичен граѓанин“.
По оставката од претседателската функција, кампањата ја продолжи како носител на изборната листа пред вонредните парламентарни избори.
📽️ ВУЧИЌ ТРГНА САМ НИЗ СРБИЈА, А НА РАДИОТО ЕЧЕШЕ ТОМА Стигна и до рибарска дозвола