ЧЕТВОРИЦАТА ОСОМНИЧЕНИ ЗА СМРТТА НА ПЕРИШ ПРЕМЕСТЕНИ ВО ДРУГ ЗАТВОР Затворските власти процениле дека е потребна безбедносна мерка
Четворицата медицински техничари осомничени за тешкото убиство на Кристијан Јосип Периш се префрлени од загрепскиот затвор Реметинец во други две установи. Одлуката е донесена од безбедносни и превентивни причини, додека нови сведоштва отвораат прашања за претходни пријави за насилство во психијатриската клиника.
Четворицата медицински техничари осомничени за тешкото убиство на 32-годишниот Кристијан Јосип Периш во загрепската психијатриска клиника „Свети Иван“ се преместени од затворот Реметинец во други две затворски установи.
Според сознанијата на „Јутарњи лист“, осомничените се префрлени во затворите Липовица и Карловац, по проценка на надлежните затворски служби.
Одлуката е донесена од безбедносни и превентивни причини, во договор со службите за извршување на казните при хрватското Министерство за правда.
Не се наведува дали на четворицата им биле упатени конкретни закани или дали преместувањето е исклучиво превентивна мерка.
Тие претходно биле однесени во Реметинец, откако судот во неделата им одредил едномесечен истражен притвор.
Колку долго ќе останат во новите установи ќе зависи од дополнителните безбедносни проценки.
Осомничените ќе можат да примаат посети од своите адвокати, членови на семејствата и други лица со судско одобрение.
Четворицата се под истрага за смртта на Периш, кој почина на 21 октомври во Клиниката за психијатрија „Свети Иван“ во загрепската населба Јанкомир.
Поранешниот атлетичар и спортски тренер бил примен во болницата за лекување, но починал по интервенција на медицинскиот персонал.
Според описот на снимките од видеонадзорот што го објавија хрватските медиуми, техничарите наводно го удирале, му го притискале вратот со колена и му држеле перница на лицето.
Истрагата треба да ја утврди одговорноста на секој од осомничените и точните околности на смртта.
Случајот доби нов пресврт откако сведок изјави дека препознал еден од осомничените медицински техничари.
Тој тврди дека истиот човек го пријавил уште во јануари годинава, поради наводно насилство врз друг пациент во истата болница.
По смртта на Периш, во Хрватска се засилија барањата за утврдување одговорност во здравствените установи.
Директорката на психијатриската клиника „Свети Иван“, Мајда Грах, на 12 ноември поднесе оставка.
Информацијата ја потврди градоначалникот на Загреб, Томислав Томашевиќ, на седница на Градското собрание.