📽️ ЗБУНЕТИ НАРЕДБИ, НЕЈАСНИ ПРОЦЕДУРИ И СМРТОНОСЕН СУДИР Што откриваат аудиоснимките од железничката несреќа во Шпанија

Аудиоснимките од комуникацијата меѓу машиновозачите и диспечерот отвораат сериозни прашања за пропустите во безбедносните процедури пред железничката несреќа во која загинаа најмалку 68 лица.

Во тешката железничка несреќа што се случи во денес во близина на местото Урда, во шпанската покраина Толедо, загинаа најмалку 68 лица, а десетици други беа повредени. Судирот се случил околу 8:53 часот, кога брзиот воз АВЕ на компанијата „Ренфе“, кој сообраќал од Мадрид кон Севилја, удрил во воз на „Ирио“ што стоел на пругата. Во двата воза имало повеќе од 500 патници, а неколку вагони излетале од шините и се урнале по насипот, објави „El País“.

Три клучни аудиоснимки од комуникацијата во моментите пред трагедијата укажуваат на можни сериозни пропусти. Две од нив се разговори меѓу машиновозачката на запрениот воз „Ирио“ и диспечерот во контролниот центар Аточа, а третата го бележи разговорот меѓу истиот диспечер и машиновозачот на возот АВЕ, кој се движел зад него.

Според објавената содржина на разговорите, диспечерот му наредил на машиновозачот на возот АВЕ, кој се наоѓал околу 25 километри зад возот „Ирио“, да продолжи со редовно возење. Според протоколот, наместо тоа, требало да му биде наложено да продолжи со возење „на видик“, со ограничување на брзината од 40 километри на час.

Истата наредба за продолжување на редовното возење ја добила и машиновозачката на возот „Ирио“. Седум минути подоцна, таа повторно го контактирала диспечерот и му соопштила дека возот сè уште стои бидејќи не може да го придвижи. И покрај тоа, според снимките, машиновозачот на АВЕ не бил предупреден дека треба да закочи, иако до судирот останувале само пет минути.

Наредба за редовно возење без потврда дека пругата е безбедна

Клучната аудиоснимка од разговорот меѓу контролниот центар Аточа и машиновозачот на АВЕ трае повеќе од пет минути. Разговорот на почетокот е збунувачки, а од него се слуша дека диспечерот има повеќе недоумици.

Сепак, разговорот завршува со јасна наредба за продолжување на редовното возење. Според информациите објавени во врска со ставот на шпанската влада, ваквата наредба очигледно го прекршила безбедносниот протокол, бидејќи претходно не било потврдено дека возот пред АВЕ се оддалечил доволно, односно повеќе од 30 километри, за да се избегне судир.

На крајот од разговорот, диспечерот и машиновозачот заеднички ги повторуваат наредбите и ги запишуваат, за да биде јасно дека двајцата ги разбрале на ист начин.

Првиот разговор: наредба за продолжување на возењето

Разговорот меѓу контролниот центар Аточа и машиновозачот на возот АВЕ:

Контролен центар Аточа: Машиновозачот на возот број 2080.

Машиновозач: Да.

Контролен центар Аточа: Во 8:36 часот.

Машиновозач: Да.

Контролен центар Аточа: Машиновозачу на возот број 2080, исклучете го и повторно вклучете го системот „LZB“. Продолжете со возењето. Потоа продолжете со возење со примена на системот „BSL“, со нормална брзина.

Машиновозач: Со нормална брзина?

Контролен центар Аточа: Да.

Според наводите во извештајот, токму ова била првата голема грешка: во 8:36 часот на возот АВЕ му било наредено да продолжи со возењето без претходно да се провери дали возот „Ирио“ се оддалечил.

Дополнително, на машиновозачот му било дозволено да продолжи со редовна брзина, без примена на безбедносната постапка за возење „на видик“, која, според објавените информации, можеби можела да ја спречи несреќата.

Машиновозачката на „Ирио“ пријавила дека возот не може да тргне

Другите две аудиоснимки укажуваат на уште два можни пропуста. Машиновозачката на возот „Ирио“ го известила диспечерот дека возот сè уште стои бидејќи не успеала да го придвижи, иако претходно добила дозвола за продолжување на возењето.

Првиот повик од возот „Iryo“ во 8:41 часот

Машиновозачка: Добро утро, Аточа. Дојде до губење на преносот додека се движев во режимот „BZL“. Следниот воз треба да се движи на 113, со брзина поголема од 200 километри на час. Сепак, не успеав да воспоставам врска. Стојам кај влезниот сигнал за Урда.

По неколку нејасни пораки, диспечерот конечно се придржува до постапката и почнува да ги подготвува наредбите и заедничкиот записник, за да се осигури дека двајцата ги разбрале на ист начин.

Диспечер: Во ред, само момент. Тука пишува: машиновозачот на возот број 6076. Исклучете го и повторно вклучете го…

Машиновозачка: И повторно вклучете го.

Диспечер: Продолжете со возење со примена на системот „BFL“, со нормална брзина.

Диспечерот, значи, повторно издал наредба за продолжување на редовното возење, овојпат на машиновозачката на „Ирио“. Тоа го направил четири минути откако истата наредба му ја издал на машиновозачот на АВЕ, иако возот „Ирио“ се наоѓал пред него и бил многу блиску.

Последниот повик: „Сè уште стојам пред влезниот сигнал“

Третата комуникација е особено важна бидејќи, според објавениот извештај, во тој момент сè уште можело да има време за спречување на трагедијата.

Машиновозачката на „Ирио“ повторно го контактирала контролниот центар и пријавила дека не може да го придвижи возот. Од разговорот, сепак, не произлегува дека диспечерот презел решителна мерка или го предупредил машиновозачот на АВЕ да запре.

Машиновозачка: Возот не ми дозволува да го проверам системот „LZB“. Затоа сè уште стојам пред влезниот сигнал.

Диспечер: Во ред. Така е? Тогаш, ништо, продолжете штом ќе можете. Ако имате проблем, повторно јавете ни се.

Машиновозачка: Во ред, важи. Ќе ве известам.

По овој разговор започнува интерна комуникација во контролниот центар, која, според објавената снимка, укажува на забуна во врска со состојбата на возовите и нивната опрема.

– Навистина, човеку. Навистина. Возот 6071 има проблеми со опремата. Се движи додека не запре. Имаше ограничување од 40 за да продолжи со системот „BSL“. Не го сменивме. Само момент – се слуша во разговорот.

Пет минути по оваа комуникација дошло до смртоносниот судир на возот АВЕ со запрениот воз „Ирио“. Според досега објавената реконструкција на разговорите, во контролниот центар очигледно не биле навреме преземени мерки што би го спречиле судирот.