„АЛЕЛУЈА, КОНЕЧНО ЕВРОПА СФАТИ ДЕКА ТРЕБА ДА РАЗГОВАРА СО ПУТИН!“ Фицо вели дека тоа го бара од почетокот на војната
Словачкиот премиер ја поздрави иницијативата на финскиот претседател Александар Стуб и норвешкиот премиер Јонас Гар Сторе за телефонски разговор со Владимир Путин и порача дека на потребата од дијалог укажува уште од почетокот на војната.
Словачкиот премиер Роберт Фицо ја поздрави иницијативата на европски лидери за воспоставување дијалог со рускиот претседател Владимир Путин, оценувајќи дека разговорите со Москва се неопходни за да се стави крај на војната во Украина.
– Алелуја, целиот свет, а конечно и Европа, сфати дека ако сакаме да го завршиме конфликтот во Украина, мораме да разговараме со рускиот претседател. Ние зборуваме за ова уште од почетокот на војната – рече Фицо во видеообраќање објавено на социјалните мрежи.
Неговата реакција следува откако финскиот претседател Александар Стуб и норвешкиот премиер Јонас Гар Сторе во вторникот иницирале телефонски разговор со Путин.
Фицо истакна дека сè повеќе европски политичари почнуваат да ја нагласуваат потребата од дијалог со Москва. Според него, разговорите со рускиот претседател се неопходен чекор доколку целта е да се постигне крај на конфликтот во Украина.
Изјавата на словачкиот премиер повторно го отвора прашањето за улогата на директната комуникација со Кремљ во напорите за завршување на војната, во услови кога европските држави бараат начин да се дојде до решение за конфликтот.