ВУЧИЌ ЌЕ СЕ СРЕТНЕ СО ФОН ДЕР ЛАЈЕН Во фокус ќе биде состојбата во Србија
На прашањето дали претседателката на Европската комисија, Урсула фон дер Лајен, го примила писмото од 31 европратеник кои бараат откажување на средбата со Вучиќ, главната портпаролка на ЕК, Пола Пињо, потврди дека писмото е пристигнато и истакна дека средбата ќе биде искористена за разговор токму за прашањата кои ги посочиле европратениците.
Претседателот на Србија, Александар Вучиќ, идната недела ќе биде во Брисел на состанок со претседателката на Европската комисија, Урсула фон дер Лајен, каде една од темите на разговор ќе биде состојбата во Србија, јави дописникот на МИА од Белград.
Информацијата за средбата денеска ја пренесоа белградски медиуми кои наведуваат дека за тоа потврда има од Брисел, од главната портпаролка на ЕК, Пола Пињо.
– Многу внимателно ја следевме ситуацијата во Србија и ги охрабривме сите засегнати страни, вклучително и граѓанското општество, да најдат начин да ги унапредат реформите што се неопходни за европската иднина на Србија. Ова е дел од она што ќе се разговара на средбата меѓу претседателката Фон дер Лајен и претседателот Вучиќ – рече Пињо на брифинг.
На прашањето дали Фон дер Лајен добила писмо од 31 пратеник во Европскиот парламент со барање за откажување на средбата со Вучиќ, Пињо рече дека писмото е примено и додаде дека средбата се смета за можност да се разговара за прашањата што ги покренале европратениците.