ВО ТРЕСКА КАЈ КИЧЕВО ЗАБЕЛЕЖАН ПОМОР НА РИБИ Риболовците бараат итна реакција од надлежните

Од спортското риболовно здружение „Хантер Фиш“ од Кичево на социјалната мрежа Фејсбук објавија фотографии од угинати риби во реката Треска и побараа итна реакција од надлежните институции.

„Реката Треска е еден од најважните водни екосистеми во Кичево. Секое загадување, труење или друга интервенција која го загрозува животот во реката мора да биде детално испитани и да се утврди причината и одговорноста“ – се вели во соопштението од Здружението.

Оттаму бараат веднаш да се земат примероци од водата и од угинатата риба, како и да се направат лабораториски анализи за да се утврди причината за угинувањето.

„Да се направи контрола на сите можни извори на загадување, а надлежните институции да ја информираат јавноста за резултатите и да преземат мерки за заштита на реката и живиот свет. Не смееме да дозволиме уште еден ваков случај да помине без одговор. Да ја заштитиме рибата, водата и природата за генерациите што доаѓаат“ – се вели во реакцијата.

МВР во својот билтен потврди дека вчера (13.09.2026) во ОВР Кичево е пријавено дека по течението на реката Треска, помеѓу кичевските села Вранештица и Бигор Доленци, е забележан помор на речна пастрмка во поголеми размери.

„За настанот е известен надлежен јавен обвинител и претставници од Министерството за животна средина и просторно планирање, по што заеднички екипи ќе преземаат мерки за целосно расветлување и документирање на настанот. Против лицето кое извршило загадување на вода со штетна материја ќе биде поднесена кривична пријава по член 223 од Кривичниот законик „загадување на вода или добиточна храна” – се вели во информацијата на МВР.