Состојба со корона до 13 часот: Вучиќ го прогласи бројот на респиратори за државна тајна

Според најновите податоци, во светот досега се регистрирани 148.595 луѓе заразени со новиот коронавирус. Од нив починати се 5.547, а оздравени се 73.706.

– Во Иран починале 97 луѓе од коронавирусот, и сега вкупниот број на лица кои го загубиле животот во оваа земја изнесува 611, објави локална телевизија. Во Иран се заразени 12.729 луѓе.

– Германија и Италија го зголемија производството на респиратори во своите држави, со цел да одговорат на силниот удар на пандемијата кој се очекува. Еден респиратор чини 17.000 долари.

– Велика Британија следната недела ќе воведе вонредни мерки за забрана на масовни собири, во обид да спречи ширење на коронавирусот.

– Српскиот претседател Александар Вучиќ изјави на прес-конференција дека бројот на респиратори од денеска ќе биде државна тајна.

– Втора жртва на коронавирусот во Бугарија. Почина 74-годишен маж, кој бил примен в болница на 8 март во тешка здравствена состојба. Тој страдал и од тешки хронични белодробни заболувања.

– Градоначалникот на Москва Сергеј Собјанин објави дека од понеделник родителите сами ќе одлучат дали нивните деца ќе одат на училиште поради опасноста од коронавирусот. Тој потврди дека до вчера во Русија се регистрирани 45 случаи на заразени со Ковид-19, од кои 24 во Москва.

– Со одлука на данската Влада границите во земјата ќе се затворат од денеска до 13 април поради коронавирусот.

– Полска не ја исклучува можноста за одложување на претседателските избори закажани за во мај, поради пандемијата на коронавирусот, изјави полскиот заменик министер за надворешни работи Павел Шефернакер.

– Официјален Абу Даби соопшти дека поради епидемија на коронавирусот ќе бидат затворени главните културни и туристички атракции, како што е музејот Лувр Абу Даби и тематскиот парк Ферари, во период од 15 до 31 март.

– Во Косово денеска е потврден нов случај на заразен од коронавирусот, така што бројката на лица носители на смртоносниот вирус се зголеми на три, јави дописникот на МИА од Приштина.

– Нови пет случаи на заразени со коронавирус се регистрирани во Албанија во последните 24 часа, со што бројот се зголеми на 38 лица. Еден од досега дијагностицираните, 73-годишна жена од Драч, веќе почина, а во тешка здравствена состојба се наоѓаат уште две лица. Досега тестирани се 505 сомнителни лица при што позитивен резултатот има кај 38 од нив. Од вкупната бројка, 22 заразени лица се од Тирана, по пет од Драч и Фиер, по два случаја на заразени има во Елбасан, Љушња и Рогожина.

– Забрана за влез на Кипар од утре до 30 март 2020, за сите кои што не се државјани на островот, немаат легален престој, не се дипломати или студенти, а се странски државјани, објави синоќа претседателот на Кипар, Никос Анастасиадис во обраќањето до јавноста. Во земјата веќе е потврден 21 случај на Ковид-19.

– Во Србија досега се регистрирани вкупно 41 потврден случај на заразени со коронавирус, соопшти Министерството за здравство на веб-страницата „Ковид19.рс“. До 8 часот денеска, во националната референтна лабораторија на Институтот Торлак тестирани се вкупно 256 лица, кои ги исполнуваа критериумите за дефинирање на случајот. Од последниот извештај вчера до 18 часот, тестирани се примероци на 17 лица, од кои шест биле позитивни и 11 негативни на Ковид-19.