ШИЛЕГОВ ГО „ОПРЕМИ“ ГРАД СКОПЈЕ За 4 години купени се 150 комунални возила ФОТО

Без донации или друга помош Град Скопје на своја рака купил над 130 нови возила за механизација од различен тип во последните 4 години, јавуваат од градот. Градоначалникот Шилегов денес покажа дел од багерите, комбињата, возилата за чистење „Брако“ и другите „тешкаши“ пред јавноста и рече дека јавните пари се трошат за вистинските приоритети на граѓаните.

– Скопје има потреба за поефикасен сообраќај, за поефикасна комунална хигиена и има потреба за уредување на новото зеленило. Токму заради тоа, наши приоритети во изминатиот период, но и периодот што претстои, ќе бидат подобрувањето на инфраструктурата а со тоа и подобрувањето на условите за работа и подобрување на услугите кои ги даваат јавните претпријатија – изјави Шилегов за медиумите.

Ако се бројат сите заедно со новите 33 автобуси и десетте новонабавени комбиња кои ќе пристигнат за две недели, сѐ на сѐ, во мандатот на Шилегов биле набавени 150 нови комунални возила. Дел од новите комбиња ќе ги користи и ЈСП Скопје, но и јавното претпријатие „Лајка“.

– ЈСП Скопје е побогато за 33 нови МАН автобуси и десет нови комбиња кои пристигнуваат за две недели. ЈП Комунална хигиена набави 51 ново возило, меѓу кои 21 ново комунално возило за собирање смет, нови автоцистерни и метларки. ЈП Водовод и канализација набави 21 возило, меѓу кои две цистерни под притисок и две за вакуум, нови две теренски возила и 11 товарни возила и градежни машини. ЈП Улици и патишта набави над 14 нови возила, ЈП Паркови и зеленило набави седум нови возила. ЈП Градски паркинг има пет нови возила „пајаци“ за подигање неправилно паркирани возила и една нова машина за чистење на снег.  ЈП Дрисла ја вративме во Скопје и финансиски ја консолидиравме, меѓутоа успеавме и да набавиме нови теренски возила. Она што е нешто најдобро во комуналните возила, е новата противпожарна скала. Прво вакво возило и опрема на територија на цела држава, меѓутоа и прво возило што градот го има купено со свои средства – изјави скопскиот градоначалник.

Одговарајќи на новинарско прашање, Шилегов рече дека не е приоритет на градот градоначалникот да купува службено возило за своите потреби и дека тој се вози со возило старо десет години.

– Приоритет на градот е да ги трошиме јавните пари, токму за ова, за комуналната инфраструктура на нашиот град – додаде Шилегов.

Скопскиот градоначалник додаде дека во идниот период градот ќе набавува возила за ЈП Паркови и зеленило и за ЈП Улици и патишта, за да се зголеми квалитетот на услугата на овие јавни претпријатија.