СЕМЕЈСТВОТО НА ФРОСИНА ГО ПРЕДВОДИ ПРОТЕСТНИОТ МАРШ Стотици граѓани ја преплавија Партизанска

На булеварот Партизански одреди во Скопје, кај Универзална сала, во 17 часот со триминутен молк почна протестниот марш поради смртта на 22-годишната Фросина од Неготино, која како пешак беше прегазена од 20-годишното момче Васил Јованов кое возело со брзина од 130 километри на час и било под дејство на алкохол.

Стотици граѓани доцна попладнево го преплавија булеварот Партизански одреди, а на чело на протестот е семејството на девојката, нејзините мајка, татко и сестра, кои в рака носат слика од нивната Фросина.

Најбројни се младите, кои масовно вторпат излегуваат на мирен протестен марш револтирани од трагедијата и од сите други трагедии низ улиците кои не завршуваат со адекватна казнивост.

Дел од младите на маршот носат црни блузи на кои пишува „Правда за Фросина“.

„Безбедноста е право, не луксуз“, „Ако корумпиран систем живее, народот умира“, „Денес правда за Фросина, утре за сите нас“, „Не е кобно местото, туку луѓето и системот“, „Her future stolen, his privilege exposed“, „Партизанска не е Формула1“, „Улиците не се тркачки патеки“ се дел од транспарентите, кои ги носат учесниците на протестот.

Маршот го организира новоформираната иницијатива Кој е следен?, што практично е и пораката за протестниот марш, од каде истакнуваат дека случајот со Фросина Кулакова не е изолиран, се повторуваат истите случаи на неконтролирано возење со години, се повторува неказнувањето и недолжното згаснување на животи.

„Фрустрирани од состојбите што не се менуваат, повикуваме на изразување на граѓански револт. Системот ги отфрла децата и младите кои поради недоволна грижа го избираат погрешниот пат. Институциите не се координирани и тоа доведува младите да не ја добиваат потребната поддршка за да бидат активни чинители во општеството. Тој недостиг на поддршка резултира до сѐ почести фатални последици.

Протестот има за цел да адресира три главни проблеми:
1. Нефункционалност на системот за заштита на децата и младите кои се во судир со законот
2. Недоволна безбедност во градовите
3. Глорификација на девијантно однесување
Алките во системот за работа со деца и млади во судир со законот не функционираат.

Институциите не настапуваат координирано за идентификување на едата и младите во судир со законите, а тие кои веќе се идентификувани не ја добиваат функционалната грижа за да се изградат во корисни и чесни граѓани на општеството. Дополнително, урбаната инфраструктура не ја осигурува потребната безбедност.

Неопходно е градовите да можат да гарантираат безбедни услови за живот. За крај, од исклучителна важност е да се поттикне јавната свест кон гласно осудување на глорификацијата на девијантното однесување. Круцијално е да се информираат граѓаните за последиците од возвишувањето на неказнивоста и заобиколувањето на правилата“, порачаа од Кој е следен?

Протестот продолжи кон Собранието, а ќе заврши пред Основниот кривичен суд Скопје.