ОКОЛУ 5.000 ЗАТВОРЕНИЦИ ВО БРИТАНИЈА ПРЕДВРЕМЕ ЌЕ БИДАТ ПУШТЕНИ НА СЛОБОДА Затворите во земјата се пренатрупани
Првично беше планирано околу 6.000 затвореници да бидат ослободени од септември, но по интервенцијата на британскиот премиер Енди Бернам, околу 1.000 осуденици за силување, сериозни сексуални злосторства против деца и за сексуална злоупотреба на деца се исклучени од шемата.
Околу 5.000 затвореници во Англија и во Велс ќе бидат предвремено ослободени во текот на следните 10 месеци, почнувајќи од октомври. Ова е новата бројка за планирани ослободувања, откако британската Влада го промени својот план за намалување на пренатрупаноста во затворите.
Првично беше планирано околу 6.000 затвореници да бидат ослободени од септември, но по интервенцијата на британскиот премиер Енди Бернам, околу 1.000 осуденици за силување, сериозни сексуални злосторства против деца и за сексуална злоупотреба на деца се исклучени од шемата.
Британскиот министер за правда Алекс Норис изјави дека би сакал да види повеќе затвореници исклучени од програмата, но предупреди дека тоа ќе доведе до „колапс“ на затворскиот систем поради недостиг на капацитет.
Според него, целта на реформата е да се реши проблемот со пренатрупаноста на долг рок, без потреба од идни итни програми за предвремено ослободување.
Одредени осуденици за одредени сексуални и насилни злосторства сè уште ќе можат да бидат ослободени по отслужување на половина од нивните казни, доколку не сториле сериозни дисциплински прекршоци за време на престојот во затвор.
Одлуката предизвика силни реакции од семејствата на жртвите.
Премиеот Бернам изјави дека програмата е резултат на долгорочно недоволно инвестирање во затворскиот систем. Тој истакна дека помеѓу 2010 и 2024 година не се изградени доволно нови затворски капацитети.
Додаде дека без овие промени, затворскиот систем би можел да се распадне, што би ја загрозило работата на полицијата и на судовите.
Британскиот премиер објави дека осудениците кои се ослободени предвреме ќе бидат под построг надзор, вклучително и следење преку џи-пи-ес на одредени сексуални престапници.
Конзервативната опозиција оцени дека промените не се доволни и наведе дека, доколку дојде на власт, ќе го зголеми бројот на места во затворите, ќе изнајми затворски објекти во странство и ќе ја забрза депортацијата на странски државјани осудени за кривични дела.