НАПРЕДНУВА ЗАКРЕПНУВАЊЕТО НА ОСУМТЕМИНА ПАЦИЕНТИ ОД КОЧАНИ ВО СОФИЈА Претседателката Сиљановска Давкова ја посети болницата „Пирогов“
Во присуство на лекар Македонец, на претседателката ѝ беше овозможен подолг разговор со најблиските роднини на македонските пациенти, кои најпофално се изразија за болничкиот персонал и манифестираа радост за видно подобрената состојба на нивните најмили, соопшти нејзиниот кабинет.
Претседателката Сиљановска Давкова ја посети болницата „Пирогов“ во Софија во којашто се лекуваат повредените од пожарот во Кочани, соопшти нејзиниот кабинет.
„Претседателката Гордана Сиљановска Давкова, со чувство на длабока и искрена грижа, најпрво ја посети болницата „Пирогов“ во Софија кадешто се згрижени и се лекуваат македонските граѓани повредени во трагичниот пожар во Кочани. За време на посетата, претседателката оствари средба со министерот за здравство, проф. д-р Силви Кирилов, заменик-директорот на болницата, проф. д-р Николај Габровски и со раководителката на Одделот за изгореници и пластична хирургија, доц. д-р Маја Аргирова. Во разговорот со нив, таа беше информирана дека здравствената состојба на осумтемина македонски пациенти е стабилна, се наоѓаат под постојан надзор од страна на врвни, искусни лекари и дека процесот на закрепнување бележи напредок“, соопшти Кабинетот на претседателката.
Во присуство на лекар Македонец, се додава во соопштението, на претседателката ѝ беше овозможен подолг разговор со најблиските роднини на македонските пациенти.
„Тие најпофално се изразија за болничкиот персонал и манифестираа радост за видно подобрената состојба на нивните најмили“, се вели во соопштението.
Претседателката изрази срдечна благодарност за бугарската навремена, стручна и несебична помош, се додава.
„Таа нагласи дека токму во мигови на голема болка и национална тага се препознаваат вистинските пријатели, потенцирајќи дека бугарската хуманост и солидарност ќе останат врежани во колективната меморија на македонскиот народ. При посетата, таа се сретна со дел од бугарските медицински тимови коишто директно учествуваа во укажувањето на итната медицинска помош, изразувајќи им особена благодарност за нивната пожртвуваност, човечност и професионалност. Упатувајќи благодарност и до Министерството за здравство на Република Бугарија за координираната и стручно водена интервенција, претседателката истакна дека нивната благородна мисија е вистинско олицетворение на медицинската етика, солидарноста и на хуманоста. Овие вредности, според неа, ќе останат темел на заемна почит и искрено пријателство меѓу двата блиски народа, бугарскиот и македонскиот“, соопшти претседателскиот кабинет.