МАДРИД ДОБИ УЛТИМАТУМ ДА ЈА РЕШИ КРИЗАТА ВО СЕУТА „Живееме во вонредна состојба!“

Триесет дена за значително да се промени состојбата во Сеута. Таков рок ѝ поставил на шпанската влада претседателот на автономниот град, Хуан Хесус Вивас.

Ако Мадрид не реагира, Вивас најавил дека ќе се обрати до највисоките судски институции во Шпанија. Тој ја обвинил централната власт за речиси целосна пасивност по огромниот мигрантски бран.

– Ќе дадам максимален рок од еден месец. Ако ситуацијата не биде решена, ќе се обратиме до други државни институции – порачал Вивас.

Тој рекол дека сака проблемот да им го изложи и на претседателите на Врховниот и на Уставниот суд.

– Се надевам дека ќе ме примат. Сеута живее во вонредна состојба – рекол Вивас.

Лидерот на Сеута ја обвинил владата дека првично се обидела да создаде слика оти состојбата брзо се нормализирала.

– Во првите денови од август, владата се обиде да ја разубави реалноста, тврдејќи дека е вратена нормалноста. Потоа следуваше речиси целосна пасивност во преземањето мерки за да се стигне до нормалноста – изјавил Вивас.

Бројките за огромниот мигрантски бран се разликуваат зависно од изворот и периодот што се опфаќа. Првичните проценки зборувале за десетици илјади луѓе кои ја преминале границата од Мароко.

Нема целосна согласност ниту за бројот на мигранти кои останале во Сеута. Вивас проценува дека во градот сè уште има меѓу 8.000 и 10.000 луѓе.

Тој се сомнева дека зад недоволно решителната реакција на Мадрид можеби стои желбата да не се нарушат односите со Мароко.

– Се надевам дека тоа не е причината, но зборувам од срце – рекол Вивас.

Лидерот на Сеута бара централната власт да воспостави единствена команда за справување со кризата. Тој инсистира и на поефикасно преземање на контролата врз состојбата.

Мигрантскиот бран ги ставил под огромен притисок локалните капацитети. Особено чувствително останува прашањето за малолетниците без придружба, за кои важат посебни правила за заштита.