ЈАНЕВСКА ВЕРУВА ДЕКА СПОСОБНИОТ ЈАКИМОВСКИ ЌЕ ГИ ЗГРЕЕ УЧЕНИЦИТЕ Пари им дадовме на сите општини, греење во училиштата мора да има

Министерката за образование и наука Весна Јаневска очекува сите училишта да имаат греење. Таа рече дека на општините им се исплатени блок-дотациите, па обврска на градоначалниците и на директорите на училиштата е да се организираат, за да нема проблеми во грејната сезона.

Вчера градоначалникот на Карпош Стевчо Јакимовски ја повика Владата да го плати заостанатиот долг за греење на основните училишта во општината, на што денеска Јаневска одговори дека пари им се префрлени на сите. Јаневска изрази уверување дека „Јакимовски е многу способен и ќе најде начин да ги затопли училиштата“.

– Министерството за обарзование и наука дава блок-дотации до општините. Блок-дотациите им ги исплативме на општините и нема што дополнително да даваме. На градоначалниците, училиштата и на директорите е како ќе се организираат, за да ја спроведат грејната сезона, така што ова не е прашање што треба да се упати до МОН – нагласи Јаневска.

Според неа, ако Јакимовски има дополнитлени барања, „да се обрати таму каде што треба, а не до МОН“.

– Очекувам сите училишта да имаат греење, зашто е невозможно без греење да се учи. Верувам дека градоначаникот кој е многу способен, ќе најде начин да ги затопли училиштата – децидна е министерката Јаневска.

Јакимовски вчера ја повика Владата да ги покрие трошоците за греење на општинските основни училишта во висина од 8,3 милиони денари, зашто локалната самоуправа, рече, не е должна да го прави тоа. Јакимовски нагласи дека минатата година за да не останат децата без греење, Општината издвоила шест милиони денари зашто Владата не сакала да ги плати сметките.