МЕЛОНИ ЈА ЗАБРАНУВА БУРКАТА ВО ИТАЛИЈАНСКИТЕ УЧИЛИШТА Ќе воведе и лимит за странски ученици во одделенијата
Италијанската влада наскоро треба да ја разгледа мерката со која законски ќе се утврди максимален број странски ученици во едно одделение. Џорџа Мелони најави и обврска за учење италијански за дел од родителите на странските ученици.
Италијанската премиерка Џорџа Мелони најави нов пакет правила за училиштата со кои нејзината влада сака да ја заостри политиката за интеграција. Меѓу мерките се ограничување на бројот на странски ученици во едно одделение и забрана за покривање на лицето со бурка или никаб.
Мелони ја најави мерката на „Феникс“, собирот на младинското крило на нејзината партија „Браќа на Италија“. Таа не кажа колкав ќе биде максималниот број или процент на странски ученици.
– Наскоро пред Советот на министри ќе пристигне мерка со која законски ќе се утврди максималниот број странски ученици во едно одделение – рече Мелони.
Кога интеграцијата станува „занемарување“
Според Мелони, едно дете кое не зборува италијански полесно може да го совлада јазикот со помош на наставниците и соучениците, но проблемот се појавува кога таквите ученици се многубројни или стануваат мнозинство.
– Ако бројот на деца кои не го разбираат јазикот стане голем, или тие дури се мнозинство, тогаш тоа повеќе не е интеграција, туку занемарување – рече таа.
Мерката треба да предвиди и обврска за учење италијански јазик за родителите на странските ученици кои имаат сериозни тешкотии со интеграцијата во училишниот систем.
Учениците без италијанско државјанство сочинуваат околу 11,6% од учениците во Италија.
Бурка и никаб нема да може во училиште
Вториот дел од најавените промени се однесува на облеката што го покрива лицето. Мелони рече дека бурката и никабот ќе бидат забранети во училиштата.
– Во училишната зграда мора да се влегува со откриено лице и никој во Италија, во име на вистинска или наводна традиција, не може да одлучи дека една млада жена мора да се крие – рече Мелони.
Најавата веднаш отвори политичка дебата, а претседателот на италијанското здружение на директори Антонело Џанели оцени дека идејата за ограничување може да има дидактичка основа, но дека практично ќе биде тешко да се спроведе во населби во кои голем дел од учениците се странци. Тој потсети дека претходно постоела насока за праг од 30%, но таа не била законски обврзувачка.