КИЕВ ТВРДИ ДЕКА РУСИЈА ГО ГРАДИ СВОЈОТ „СТАРЛИНК“ До 2027 година може да летаат 300 сателити во орбитата
Рускиот систем „Рассвет“ засега брои 16 сателити, но темпото на лансирање забрзува. Украинското разузнавање предупредува дека Москва напредува побрзо од очекуваното.
Русија забрзано развива сателитска мрежа која треба да функционира слично на „Старлинк“. Москва веќе почнала да ги лансира сателитите побрзо од првичниот план, тврди украинското воено разузнавање.
Заменик-шефот на ГУР, генерал-мајор Вадим Скибицки, изјавил дека системот „Рассвет“ во моментов има 16 сателити.
До 2027 година Русија планира во орбитата да има речиси 300.
Од 16 до речиси 300 сателити
„Тие веќе почнаа да ги лансираат многу побрзо од првично планираното“, изјавил Скибицки во интервју за РБЦ-Украина.
„Кога Русија ќе воспостави целосна сателитска констелација, системот ќе функционира како „Старлинк“. Веќе има дискусии за тоа како да се спротивставиме“, додал тој.
„Старлинк“ на „Спејс екс“ одигра значајна улога во украинските комуникации и во операциите со беспилотни летала. Системот функционира во Украина, но официјално не е достапен во Русија.
Москва претходно се снабдувала преку црниот пазар
Руските сили сепак користеле терминали набавени преку црниот пазар. Според украинската страна, Киев потоа побарал од „Спејс екс“ да го ограничи нивното користење.
Развојот на сопствена сателитска констелација би ја намалил руската зависност од такви терминали.