ТРГОВЦИ, УГОСТИТЕЛИ И ДРУГИ СУБЈЕКТИ СÈ УШТЕ НЕ ИЗДАВААТ ФИСКАЛНИ СМЕТКИ Од почетокот на годината изречени се 242 глоби

Во изминатите четири месеци даночните инспектори извршиле  вкупно 960 теренски контроли за фискализација при што кај повеќе од  40% од контролираните субјекти се утврдени неправилности во примената на  Законот за регистрирање на готовински плаќања (ЗРГП). 30% отпаѓаат на неиздавање фискални сметки, издавање непропишани сметки и непоседување фискална каса.

Со контролите биле опфатени 434 угостителски објекти, 318 трговски објекти, 201 услужен објект и кај 7 приредувачи на игри на среќа. Основа на контролите била пријави од граѓани преку линијата 198, интерни анализи на УЈП и координација со други надлежни институции.

Кај 395 субјекти се констатирани неправилности при регистрирање на готовинското плаќање за што на субјектот и неговиот раководител им се изречени глоби.

Од УЈП велат дека најчеста неправилност и во овие контроли е неиздавањето фискални сметки, при што во првите четири месеци од 2026 година се изречени 242 глоби по овој основ.

Значителен раст е евидентиран и кај прекршоците поврзани со невоведување фискален систем, каде што бројот на изречени глоби е зголемен од 7 на 32 во споредба со минатата година.

Поради повторено неиздавање фискални сметки во период од 2 години, на 25 субјекти им е изречена мерка привремена забрана за вршење дејност – запечатување на објектите.

Од УЈП, велат дека загрижува фактот што бројот на субјекти со утврдени неправилности бележи раст и покрај континуираните мерки на УЈП.

-Додека минатата година неправилности биле утврдени кај 32% од контролираните субјекти, оваа година тој процент е зголемен на 42% – велат од УЈП.

Оттаму додаваат дека граѓаните годинава поднесуваат повеќе пријави за незидавање фискални сметки.

–  Во овој период пристигнати се вкупно 887 пријави од граѓани, што е зголемување за 36% во однос на минатогодишниот број на пријави. Граѓаните можат директно да пријавуваат неправилности и преку апликацијата МојДДВ – велат од УЈП.