ТРАМП НАЈАВИ ДЕКА ЌЕ ГИ ОСЛОБОДИ СИТЕ ПОЛИТИЧКИ ЗАТВОРЕНИЦИ ВО ВЕНЕЦУЕЛА Досега се ослободени 600, остануваат уште 450 притвореници

Американскиот претседател Доналд Трамп синоќа изјави дека сите политички затвореници во Венецуела на крајот ќе бидат ослободени, бидејќи неговата администрација ги продлабочува врските со вршителот на должноста претседател на земјата, Делси Родригез, јави ДПА.

– Ќе ги извадиме сите – им рече Трамп на новинарите во Вашингтон пред да замине за Кина.

И покрај американската воена операција во јануари што резултираше со апсење на авторитарниот лидер Николас Мадуро, стотици критичари на владата остануваат притворени во Венецуела, наведуваат групите за човекови права, пренесува ДПА.

Мадуро и неговата сопруга, Силија Флорес, беа уапсени во Каракас и однесени со авион во Њујорк, каде што се соочуваат со судење по обвиненија за трговија со дрога.

Родригез, поранешна потпретседателка, ја презеде власта привремено по отстранувањето на Мадуро и оттогаш соработува со Вашингтон по прашања, вклучително и извозот на нафта.

Трамп ја пофали Родригез, велејќи дека таа работи „одлична работа“ и дека Венецуелците се ентузијастички настроени кон промените во земјата.

Но, опозициските групи продолжуваат да бараат пошироки демократски реформи, вклучително и слободни избори и ослободување на сите политички затвореници.

Организацијата за човекови права „Форо Пенал“ вели дека повеќе од 600 политички притвореници се ослободени од јануари, иако над 450 сѐ уште се во притвор, пренесува ДПА.

Не е објавен распоред за нови избори во оваа јужноамериканска земја, која ги поседува најголемите докажани резерви на нафта во светот, потсетува ДПА.