ЛАЖНИ КАЗНИ ЗА „СЕЈФ СИТИ“ СИГНУВААТ ПРЕКУ ЅМЅ Полицијата со апел до граѓаните да не наседнуваат

Граѓани во Македонија деновиве добиваат сомнителни пораки за наводни сообраќајни прекршоци, зад кои всушност стои обид за измама и кражба на лични податоци.

Од Министерство за внатрешни работи информираат дека непознати лица испраќаат SMS-пораки од странски број (+639606963624), во кои се тврди дека примачот направил сообраќаен прекршок и треба да плати казна.

Во пораката има линк кој води до лажна веб-страница што изгледа како официјална страница на МВР. Таму од граѓаните се бара да ја внесат регистарската табличка, по што им се прикажува наводен прекршок и се бара уплата од околу 1.500 денари со платежна картичка.

Од полицијата предупредуваат дека станува збор за класична интернет измама, чија цел е да се дојде до лични и банкарски податоци.

Апелот до граѓаните е да не отвораат сомнителни линкови, да не внесуваат податоци на непроверени страници и да не веруваат на пораки кои не доаѓаат од официјални извори.

„Не оставајте лични и финансиски податоци на вакви страници, бидејќи можат да бидат злоупотребени“, предупредуваат од МВР.