НЕВИДЕНО НАСИЛСТВО ВО АВСТРАЛИЈА ПО УБИСТВО НА ДЕВОЈЧЕ Абориџините „го запалија“ градот барајќи традиционална одмазда

Жестоки судири избија во градот Алис Спрингс откако беше уапсен 47-годишен маж осомничен за киднапирање и убиство на петгодишно домородно девојче.

Станува збор за Џеферсон Луис, кој бил пронајден во еден локален камп, по што бил нападнат од жители и претепан до бессознание пред да биде приведен од полицијата.

Неговото приведување предизвика бурна реакција кај дел од заедницата. Околу 400 луѓе се собраа пред болницата во Алис Спрингс, каде што тој бил однесен на лекување, барајќи таканаречена „payback“ правда – традиционален облик на казнување во некои домородни заедници, слична во некои аспекти со балканскиот концепт на „крвна одмазда“

Според снимки објавени од Еј-би-си (Australian Broadcasting Corporation), демонстрантите фрлале предмети, палеле пожари и оштетиле полициски и медицински возила. Во судирите биле повредени полицајци и медицински работници, а полицијата употребила солзавец и гумени куршуми за да ја растера толпата.

Телото на девојчето, кое семејството бара да се нарекува Куманџаји Литл Бејби поради културни обичаи, било пронајдено по неколкудневна масовна потрага во околината на градот.

Осомничениот, кој има претходни пресуди за насилство и неодамна бил пуштен од затвор, подоцна бил префрлен во Дарвин поради безбедносни причини и се очекува да биде официјално обвинет.

Премиерот Ентони Албанезе изјави дека го разбира гневот и болката во заедницата, но повика на смиреност и почитување на правниот процес. Сличен апел упатија и полицискиот комесар Мартин Дол и домородниот старешина Робин Гранитс, кој истакна дека насилството „не е начин“ за справување со трагедијата.

Случајот ги актуелизира прашањата за длабоките социјални нееднаквости во Австралија, каде домородното население сочинува околу 3–4 проценти од вкупната популација, но се соочува со значително повисоки стапки на сиромаштија, затворање и други општествени проблеми.

It is feared Alice Springs could experience more violence after ugly riots triggered by the arrest of murder suspect Jefferson Lewis who is accused of abducting and killing a five-year-old girl. Police and ambulance officers were hurt in rolling violence last night and today,… pic.twitter.com/lMhhI7CzVZ

— 7NEWS Adelaide (@7NewsAdelaide) May 1, 2026