ПАЦИЕНТИТЕ СЕ ТРЕТИРААТ СО ТРЕТА ГЕНЕРАЦИЈА ИНСУЛИН Владата го разрешува дефицитот на сензори

Најголем број од пациентите со дијабетес во моментот се третираат со трета генерација инсулин и споредено со регионот и со минатото тоа е голем напредок, истакна денеска генералниот директор на Фондот за здравствено осигурување, Сашо Клековски, одговарајќи на новинарско прашање по повод 14 ноември, Светскиот ден на дијабетесот.

– Пациентите имаат право да бараат уште. Мислам дека Владата работи да се разреши дефицитот на сензори во скора иднина. Од 2027 година дијабетесот ќе стане дел од работата на Фондот за здравствено осигурување и од сега се подготвуваме, имаме цела година за да обезбедиме систем во кој со соодветни критериуми сите ќе бидат згрижени – рече Клековски по настанот по повод одбележувањето 25 години од осамостојувањето и континуираното работење на Фондот.

Фондот за здравствено осигурување (ФЗО) денеска одбележа 25 години од основањето. Генералниот директор на Фондот, Сашо Клековски во својата презентација истакна дека ФЗО има 1.840.000 осигуреници, од кои 1.200.000 се носители на здравственото осигурување.

Буџетот на Фондот е 53 милијарди денари, а за здравствено осигурување се плаќа 3.000 денари месечно. Ваквото вложување, како што кажа, е доволно и е на ниво на средноразвиени земји.

Во своето обраќање Клековски изнесе низа статистички податоци за тоа колку се вложува во јавното здравство и колку услуги испорачуваат здравствените работници, колку лекови се на позитивната листа, колку лица се лекуваат во странство итн.

– Овој здравствен систем испорачува. Да, има недостатоци, ама испорачува. Дваесет и пет години на раст, но и на грешки од кои се обидуваме да учиме и да не ги повторуваме. Презентираме што е направено во овие 25 години, кој обем и квалитет на работа го поддржуваме, затоа што се уште Македонија е во одредени параметри понапред од регионот и од соседните земји. Сметам дека презентацијата е неопходна за балансиран увид во работата на Фондот – нагласи Клековски.

Одговарајќи на новинарско прашање по настанот, Клековски рече дека има релативно одлично институции.

– Можете да отидете во ПЕТ центарот да видите кое е нивото на организација и услуги таму, а имаме установи кои се на пониско ниво. Значи, една генерална оценка не може да се даде. Во јавното здравство без лекарите во приватното здравство, матичните лекари и специјалистите, имаме над 18.400 вработени. Ние со последните зголемувања постигнавме просечна плата од над 50.000 денари, која е поголема од просечната плата во Македонија земајќи ја предвид образовната структура која ја имаме, бидејќи во здравството не работат само доктори. Таа плата е значајно поместување – рече Клековски.

Владата, посочи тој, има среднорочен план до 2028 година за зголемување на платите. Според него, тоа што мора да се направи е зголемена контрола и континуитетот на давањето услуги.

– Не може заради поправка на апарати или неуспешен тендер да има прекини во давањето здравствени услуги. Ако има прекини мора да има систем кој ќе сигнализира каде таа услуга ја има. Имаме 50 јавни и приватни лаборатории кои работат тумор маркери. Ако нема во една лабораторија, пациентите треба да имаат јасна патека која е најблиската лабораторија каде тие тумор маркери се работат – истакна Клековски.