И СРЕДНОШКОЛЦИТЕ ЌЕ МОЖАТ ДА РАБОТАТ Законот за работно ангажирање го помина првиот собраниски филтер
Со законот се регулира начинот на воспоставување на работни ангажмани со или без прекини кои ќе имаат значајна улога за вклучување на одредени категории лица во рамки на формалната економија.
Законот за работно ангажирање на лица предложен од ВМРО-ДПМНЕ, а подржан од повеќе парламентарни партии вчера ја помина првата фаза во собранието, информира денеска Тони Јаревски, пратеник од Пратеничката група на ВМРО-ДПМНЕ и коалицијата „Твоја Македонија”.
Како што рече, со законот кој треба да придонесе за сузбивање на неформалната економија, се регулира начинот на воспоставување на работни ангажмани со или без прекини кои ќе имаат значајна улога за вклучување на одредени категории лица во рамки на формалната економија.
– Остварениот паричен надоместок на работно ангажираното лице, не влијае врз губење или остварување на права стекнати согласно прописите од областа на социјалната и детската заштита, старосна и семејна пензија, по основ на осигурување во случај на невработеност и невработените не се бришат од евиденцијата на невработени лица, Студентите не ги губат правата стекнати по основ на посебните закони од образованието и на други права утврдени со посебни закони – рече Јаревски.
Тој појасни дека законот дава можност и заштита за ангажман и за средношколците односно за лица помлади од 18 години кои согласно општите прописи од работните односи ги исполнуваат условите за засновање на работен однос.
Овој Предлог на Закон за работно ангажирање лица, рече тој, ќе ја поедностави постапката на работно ангажирање преку воведување на поедноставен систем за регистрација, кој ќе биде управуван од Агенцијата за вработување. Даноците и социјалните придонеси ќе се обработуваат и плаќаат преку системот кој го администрира УЈП, а важно за нашата држава е што јавните институции нема да подлежат на трошоци за надградба на информациските системи и обуката на јавните службеници.
-Ќе се поттикне фер конкуренција, осигурувајќи дека сите работодавачи ќе можат да ангажираат работници под исти услови, особено во периоди со зголемен обем на работа, создавајќи поинклузивен и подинамичен пазар на труд. Дополнително, оваа правна рамка ќе помогне во надминување на недостатокот од работна сила, ќе ја зајакне економската стабилност и ќе го подобри спроведувањето на мерки за работа со овие категории граѓани за јакнење на нивните вештини и капацитети правејќи ги конкурентни на пазарот на трудот – рече тој.
Јаревски информира дека е планирана на јавната расправа за Законот на која ќе бидат поканети сите засегнати страни и сите кои имаат желба да допринесат со своите забелешки и размислувања.