ИЗНЕНАДУВАЧКИ БРОЈКИ ОД БОЈКОТОТ НА МАРКЕТИТЕ ВО БОСНА И ХЕРЦЕГОВИНА Прометот во маркетите се зголемил, наместо да се намали
Официјалната статистика на даночната управа на БиХ покажува дека прометот во продавниците на 31 јануари бил еднаков или дури поголем од претходните денови.
Бојкотот на продавниците организиран на последниот ден од јануари во Босна и Херцеговина во знак на протест против високите цени, според податоците на даночната управа, не ги даде очекуваните резултати, додека организаторите на акцијата најавуваат нови, подолгорочни мерки.
Официјалната статистика на даночната управа на БиХ покажува дека прометот во продавниците на 31 јануари бил еднаков или дури поголем од претходните денови. Според овие податоци продавниците оствариле промет од 52,1 милиони евра, што е повеќе од претходниот ден кога изнесувал 51,9 милиони, а значително повеќе од една недела порано кога прометот бил 47,2 милиони евра.
Сличен извештај дојде и од Даночната управа на Република Српска, каде што на 31 јануари е забележан промет од 20,3 милиони евра, што не е значителен пад во однос на претходната недела кога прометот изнесуваше 21,8 милиони евра.
Бројките предизвикаа сомнеж кај организаторите на бојкотот и дел од јавноста, бидејќи бројни граѓани и медиуми објавија значително попразни продавници и трговски центри. Фејсбук групата Бојкот БиХ, која има повеќе од 50.000 членови, објави дека продавниците забележале значителен пад на прометот и најавија продолжување на бојкотот.
Тие се во дилема дали зголеменото индивидуално трошење на клиентите на денот на бојкотот можело да го компензира намалениот број трансакции или податоците се резултат на манипулации за намалување на влијанието на кампањата.
И покрај неочекуваната статистика, организаторите на бојкотот не се откажуваат и најавуваат нови, подолгорочни акции кои имаат за цел да ги притиснат трговските синџири да ги намалат цените и да обезбедат пофер услови за потрошувачите. Планиран е повеќедневен бојкот, како и промоција на алтернативни форми на купување производи директно од производителите и локалните трговци на мало. Така, во работните денови, од понеделник до петок, 6 февруари, организаторите ги повикаа граѓаните да ги намалат набавките, додека во петок на 7 февруари и во сабота на 8 февруари повикуваат на тотален бојкот на продавниците.