СКОПЈЕ НА НОЗЕ, ПРОТЕСТ ВО 13 ЧАСОТ ПРЕД „СИЛБО“ Граѓаните бараат правда за Фросина Ќулакова

Во Скопје денеска во 13 часот ќе се одржи протест на местото каде што загина 22-годишната Фросина Кулакова, која беше прегазена од 20-годишен возач без возачка дозвола, додека минувала на пешачки премин.

Граѓаните, револтирани од трагедијата и судската пракса, преку социјалните мрежи повикаа на собирање пред пекарницата „Силбо“, барајќи правда и построги санкции за несовесните возачи.

Исто така граѓаните на Неготино денеска ќе одржат мирен собир во чест на 22-годишната Фросина Ќулакова, која завчера трагично го загуби животот откако беше прегазена на пешачки премин во Скопје.

Настанот ќе започне во 15 часот на градскиот плоштад во Неготино и е организиран од граѓани кои, покрај тоа што ќе ѝ оддадат почит на Фросина, ќе испратат и силна порака – „Доста е!“. Тие бараат ригорозни мерки против несовесните возачи, поголема безбедност на улиците и крај на неказнивоста за сообраќајните прекршители.

Случајот предизвика лавина реакции во јавноста, откако беше обелоденето дека возачот возел под дејство на алкохол и ја прегазил младата девојка и покрај тоа што семафорот покажувал црвено светло. Протестот има за цел да испрати јасна порака за потребата од одговорност и заострување на казнената политика за вакви случаи.