ГРАДЕЖНИЦИ СКИНАЛЕ КАБЕЛ, ШТИПСКАТА БОЛНИЦА ДОБИВА СТРУЈА ОД АГРЕГАТ Нема опасност за пациентите, уверува директорот
Се очекува проблемот со струјата да се реши околу полноќ, вели директорот на Клиничка болница-Штип, Владко Захариев.
Штипската Клиничка болница во моментов се снабдува со струја од агрегат, бидејќи околу 15 часот при изведување на градежните активности на новиот влез на болницата e скинат средно напонски кабел, потврди за МИА вечерва директорот на Клиничка болница-Штип, Владко Захариев.
Тој истакна дека пациентите кои се критични и се хоспитализарни во болницата не се загрозени, бидејќи струја има за апаратите и за салите.
– Информирани се сите болници и регионални центри во источниот регион, доколку имаат пациенти кои се критични да се прифаќаат во болницата во Кочани или да се транспортираат во Скопје. Пред половина час пристигна екипа на ЕВН и работи на санација на кабелот – вели Захариев.
Се очекува проблемот со струјата да се реши околу полноќ. Захариев додава дека нема потреба од паника или стравување, бидејќи се приклучени на агрегат и се работи на решавање на проблемот.