АПСУРДНО Е БАРАЊЕТО НА БУГАРИЈА ГОРАНИТЕ ДА СТАНАТ БУГАРИ ВО КОСОВСКИОТ УСТАВ! Македонците од Албанија прашуваат дали ЕУ гледа што прави нивната членка во регионот
Македонско друштво „Илинден“ - Тирана ги повикува европските институции да ги запрат уцените од страна на бугарската држава кон други држави со заканите за вето за нивната интеграција во Европската Унија.
Македонското друштво „Илинден“ – Тирана во вечерашната реакција најостро го осудува инсистирањето на бугарскиот претседател Румен Радев, за, како што велат, да се признаат непостоечки Бугари во Гора на Косово, област каде живеат Македонци.
Софија неодамна постави три барања за Приштина во врска со Гораните и нивната националност – признавање на наводно бугарско малцинство, загарантирано место во Советот на заедници и вметнување на Бугарите во Уставот, во пресрет на претстојниот попис на Косово.
Ова наиде ан негативни реаклции од македонците во Албанија, каде исто така Бугарија изврши притисок за официјално признавање на Бугари како етничка припадност.
„Македонското друѓтво „Илинден” го изразува својот револт затоа што официјална Софија ја продолжува својата антимакедонска пропаганда меѓу Македонците во областа Гора, Република Албанија и во Република Косово, обидувајќи се да ги претстави како Бугари“ – се вели во реакцијата.
Друштвото потсетува дека многупати досега се залагала за вистината, според која Македонците во областа Гора се неотуѓив и нераскинлив дел од македонскиот народ.
„Нивната самосвест е македонска, а обидите на бугарската политика да го обезличи и побугарчи ова македонско население се остваруваат со уцени за подобрување на нивниот социјален статус и економска положба со делење на бугарски пасоши, со ветувања за стипендии за студирање на младите Македонци. Цената на тие бугарски „услуги“ се сведуваат на потпишување изјава на Македонците дека се Бугари и дека и нивните предци биле Бугари. Македонците во областа Гора никогаш не биле, ниту своеволно би биле Бугари“ – се наведува во реакцијата.
Уште се оценува дека е „срамен, недемократски и антиевропски потегот на бугарскиот претседател Румен Радев да го уценува косовскиот политички врв да ги признае непостоечките Бугари во Република Косово”.
Секако, се посочува понатаму, ваквиот негов потег е веќе виден во Република Албанија, каде со уцени и закани по европската иднина на државата, Бугарија наметна признавање на непостоечки Бугари во Законот за малцинства усвоен во 2017 година во Република Албанија, иако во земјата во сите пописи од 1923 до 2011 година ниту еден жител не се изјаснил како Бугарин.
„Македонско друштво „Илинден“ – Тирана ги повикува европските институции да ги запрат уцените од страна на бугарската држава кон други држави со заканите за вето за нивната интеграција во Европската Унија. Во исто време апелираме до Владата на Република Косово да преземе сериозни мерки во насока на поголема грижа за положбата и правата на припадниците на македонскиот народ во Република Косово и да не дозволи признавање на непостоечко бугарското малцинство во Република Косово, се нагласува во реакцијата.
Македонско друштво „Илинден“ – Тирана го потсетува бугарското раководство дека „македонската нација е историски факт и дека нам не ни треба одобрение од други држави за да се изјасниме дека сме тоа што сме“.