ЗА КОГО СЕ ОДРАБОТУВА ДА ПЕЧАЛИ НА ЦРНО? Се подготвува манипулативна кампања која ќе внесе отпор кај родителите против игрите на среќа
Одредени центри на моќ, кои имаат бизнис интерес да се затворат легалните игри на среќа во Северна Македонија, служејќи се со манипулација ќе се обидат да внесат немир кај родителите на учениците за да вршат уште пожесток притисок врз верските заедници, државните институции, политичките партии и закуподавачите на објектите, со цел да ја истуркаат нивната агенда, предупредува Здружението Сакам да работам.
Во специјалната кампања што се води против легалните игри на среќа во Северна Македонија очигледно веќе не се штедат ниту финансиски средства, ниту логистика, реагира Здружението на вработени во секторот игри на среќа Сакам да работам.
– Должни сме да ја предупредиме јавноста дека „свиркачи“ ни доставија информација дека одредени центри на моќ, кои имаат бизнис интерес да се затворат легалните игри на среќа во Северна Македонија, служејќи се со манипулација ќе се обидат да внесат немир кај родителите на учениците за да вршат уште пожесток притисок врз верските заедници, државните институции, политичките партии и закуподавачите на објектите, со цел да ја истуркаат нивната агенда. Извршител на оваа манипулација се очекува да биде таканареченото Движење „Антикоцкање“ од Тетово. Параван зад вистинските намери ќе биде наводна нивна грижа за учениците. Ќе се шират лажни вести, ќе се користат манипулативни податоци како дел од специјалната кампања против игрите на среќа – предупредуваат од Здружението.
Вработените се згрозени и вознемирени од, како што велат, ваквите приземни конструкции. И меѓу вработените во игрите на среќа има родители на ученици.
„Никој од нас не може да работи на штета на младината. Затоа сакаме да ги разобличиме лагите. Редно е за почеток претставниците на „Антикоцкање“ од Тетово да одговорат на следните прашања:
– Дали и колку финансиски средства примиле во готово? По чиј налог ќе се обидат да манипулираат со родителите на учениците? Колку чини и кој ги покрива трошоците за дизајнот и за изработката на претходните пропагандни материјали и оние кои планираат да ги пласираат во јавност? Чии бизнис интереси се кријат зад нивните активности? Дали одработуваат да се затвори легален бизнис за некој да печали од интернет игри на среќа и играчници на црно, без контрола од државата? Дали така учениците ќе бидат во поголем или помал ризик? Кој ќе понесе одговорност за штетата што ќе следи? Зошто сакаат да остават 10 000 луѓе без своите работни места?“
Здружението ги повикува Владата и Собранието да отворат четири очи и да внимаваат да не паднат во замката што им се мести.
„Погрешни измени на Законот за игри на среќа и забавните игри ќе направат страшни последици на среден рок. Штетата што ќе се направи, многу долго нема да може да се санира. Затворањето на легалните игри на среќа секаде каде се спроведе предизвика играње на црно по подруми без ред и поредок“, се нагласува во реакцијата на Здружението Сакам да работам.