ЈАВИ СЕ ИЛИ ЌЕ ТЕ СТАВИМЕ НА ЛИСТА НА ПЕДОФИЛИ!? Лажни пораки од српско МВР ги плашат Тетовци
Во пораките се бара од примателите во рок од 72 час да контактираат со испраќачите за да не бидaт процесуирани кај Јавен обвинител, да не бидат регистрирани како сексуални претстапници и да не бидат медиумски експонирани. Станува збор за измама, предупредува СВР Тетово.
Предупредување дека се можни жртви на измама денеска испрати до јавноста СВР Тетово по неколкуте пријави до нив дека граѓани и правни лица добивале пораки на електронска пошта наводно испратени од српското Министерство за внатрешни работи. Од граѓаните било барано да ги контактираат испраќачите со цел да не бидат регистрирани како сексуални престапници.
– Секторот за внатрешни работи Тетово ги известува граѓаните дека во последно време до физички и правни лица од тетовско-гостиварското подрачје зачестено се испраќаат пораки од лица кои во пораките им се претставуваат како наводни функционери на српското Министерство за внатрешни работи и ги известуваат дека против нив се покренати наводни судски постапки за педофилија, сајбер порнографија или други кривични дела. Покрај ова, во испратените пораки од нивните приматели се бара во рок од 72 часа да контактираат со испраќачите за да не бидат процесуирани кај Јавен обвинител, да не бидат регистрирани како сексуални претстапници и да не бидат медиумски експонирани – вели Марјан Јосифоски портпарол на СВР Тетово.
Граѓаните да не ги отвораат ваквите пораки, апелира СВР Тетово, а ако веќе ги отвориле, да се обратат во најблиската полициска станица за преземање соодветни мерки.