ЛЕВИЦА БАРА ПРЕКИН НА ПРЕГОВОРИТЕ СО БУГАРИЈА Ако на ЕУ ѝ пречи македонскиот народ, тогаш да си бараме алтернатива

Две години Левица предупредува за штетноста од преговорите со Бугарија и бара нивен прекин. Владата на СДСМ и на ДУИ, која не зависи од електоратот, туку од служењето на надворешни интереси и од создавање на привид за европска извесност, која е очевидно неизвесна, е спремна да изврши уште едно национално предавство, се вели во соопштението испратенот од партијата Левица.

– Иако е јасно дека и Министерството за надворешни работи има учествувано во изготовка на нацрт-предлогот на ЕУ, министерот Бујар Османи и премиерот Димитар Ковачевски одбиваат да заземат став и продолжуваат со рушење на македонската држава. Од новиот предлог на Европската Унија, јасно е дека се наметнати нови (не)европски барања, кои го загрозуваат правото на самоопределување на македонскиот народ и ја деградираат македонската државност. Европските бирократи ги инкорпорираа речиси сите негаторски барања на бугарската влада и повторно застанаа во одбрана на шовинизмот на соседните држави. Од Македонија се бара уште една нова присилна промена на Уставот, со што еклатантно се врши мешање во внатрешните работи на Републиката и се загрозува сувереноста на македонската држава! ЕУ, иако хиерархиски е далеку пониска од ООН, преку Бугарија го спори постоењето на македонскиот јазик, кој е признаен, и бара договор помеѓу Македонија и Бугарија за “дообјаснување” на македонскиот јазик за целите на ЕУ – се вели во соопштението.

Оттаму додаваат дека е преседан во целото постоење на ЕУ, билатерален спор да влегува во преговарачка рамка. Од Левица го посчуваат примерот на Албанија и Грција, кои имаат билатерален спор што трае со децении, но никогаш овие држави не биле уценети со перфидни методи, како што тоа му се прави на македонскиот народ, заклучуваат од партијата.

– ЕУ констатираше говор на омраза, без да потенцира дека се работи за Република Бугарија, не констатираше проблем (провокација) во отварањето на културен центар именуван по фашист, со што дополнително ја одобри оваа национал-шовинистичка нарација. Во предлог-заклучокот ЕУ констатира дека Македонија треба да ги напредне правата на етничките заедници, додека бугарскиот Устав не признава никакви етнички заедници. Доколку се земе во превид методологијата за пристапување, предложена од Франција, со која се овозможува и веќе затворените поглавја одново да се отворат, Бугарија во целиот процес ќе има неограничена можност да го искористи правото на вето. Повторно повикуваме на итен прекин на преговорите со Бугарија и апелираме и останатите парламентарни партии да излезат со ваков став, во спротивно, ќе бидат директни учесници во уште едно национално предавство. Доколку Европската Унија не може да го прифати македонскиот народ, јазик, држава и култура, такви какви што се, тогаш дојдено е времето за нова надворешно-политичка алтернатива – порачаа од Левица.