А1 МАКЕДОНИЈА ПОСТАВИ 5Г МРЕЖА ВО СКОПЈЕ Започнува финалното тестирање на новата индустриска револуција

А1 Македонија со задоволство ја информира јавноста дека постави 5Г мрежа во центарот на Скопје за финално тестирање, со што компанијата со најголем број корисници на мобилна телефонија и најбрз мобилен интернет е чекор поблиску до комерцијално воведување на 5Г технологијата за сите корисници, наведено е во соопштението на компанијата.

– Поставувањето на тестната 5Г мрежа е уште еден доказ за нашата посветеност и стратешката определба за креирање и за воведување најсовремени дигитални решенија, кои овозможуваат нови и напредни дигитални искуства на корисниците. Ова е само почеток на новата индустриска револуција, а 5Г е горивото на кое таа работи. Продолжуваме понатаму со интензивни активности за што побрза имплементација на оваа технологија за комерцијална употреба – изјави Методија Мирчев, извршен директор на А1 Македонија.

Новата 5Г мрежа ќе овозможи поголема брзина и поголем капацитет, помала латенција и поголема мрежна покриеност во преносот на податоци за кои корисниците веќе и сега имаат реална потреба. Со ова финално тестирање, појаснуваат од компанијата, достигната е брзина од 1Gbps за пренос на податоци, реализирано на мобилен телефон кој поддржува 5Г мрежа.

За потсетување, A1 Македонија, кон крајот на 2019 година успешно ја заврши првата фаза на тестирање на 5Г технологијата во лабораториски услови. Тестовите беа направени со комерцијални терминални уреди во географски ограничена реална средина и ги потврдија очекувањата и можностите на 5Г технологијата во насока на остварување огромни брзини, многу ниски латенции и можност за поврзување на интернет на огромен број уреди, односно иновативни апликации на петтата генерација безжична технологија.

Новата генерација технологии, 5Г, е веќе воведена во компаниите членки на А1 Телеком Групацијата и тоа во Австрија, Хрватска и во Бугарија.