ИАКО МОЖЕБИ ИМААТ ПОЈАК ИМУНИТЕТ Потребно е оздравените од ковид-19 да се вакцинираат
Идејата дека е подобро да се остане невакциниран произлегува од заблудата дека чекањето за стекнување на природен имунитет е всушност прашање на избор. Но, тој избор може да чини многу.
Израел е далеку пред остатокот од светот кога станува збор за вакцинирање на населението против коронавирусот. Затоа не треба да изненадува фактот што податоците од Израел предизвикуваат големо внимание, бидејќи за остатокот од човештвото, тоа е на некој начин поглед кон иднината, пишува „The Conversation“.
Научниците од здравствените служби во „Maccabi Healthcare Services“ во Тел Авив неодамна објавија студија која сè уште чека научни прегледи, сугерирајќи дека луѓето кои имале ковид-19 имаат повисоко ниво на заштита од оние кои ја примиле вакцината, кога станува збор за заштита од инфекција со делта варијантата.
За жал, некои ги зедоа здраво за готово резултатите од оваа моментално непрегледана студија, па заклучија дека е подобро да се заразат отколку да се вакцинираат.
Инфекцијата го изложува нашиот имунитет на неколку вирусни протеини на коронавирусот, додека повеќето вакцини против короната имунитетот го стимулираат со реакцијата на само еден антиген – спајк протеинот на новиот коронавирус. Ова резултира со повеќе насочен, но во исто време поограничен имунолошки одговор, за разлика од самата болест со ковид-19.
Иако луѓето кои се заразени со коронавирусот можат повторно да се заразат, природно стекнатиот имунитет продолжува да се развива со текот на времето, а антителата остануваат присутни подолго отколку што се мислеше. Новите докази сугерираат дека имунитетот по тешка и блага инфекција штити од симптоматски и асимптоматски реинфекции.
Освен опасноста да се извлечат заклучоци од податоците што не биле прегледани од независни научници, подеднакво е клучно да се стават податоците во вистинскиот контекст. Иако студијата укажува на јачината на природно стекнатиот имунитет, тој не ги зема предвид ризиците вклучени во постигнувањето природен имунитет преку инфекција. Исто така, студијата не фрла сенка врз имунитетот стекнат со вакцинација.
Покрај тоа, придобивките од вакцинацијата не беа споменати во студијата, бидејќи не вклучува луѓе кои не биле заразени со новиот коронавирус.
Идејата дека е подобро да се остане невакциниран произлегува од заблудата дека чекањето за стекнување на природен имунитет е всушност прашање на избор. Но, тој избор може да чини многу.
Покрај ризикот од развој на тежок ковид-19 и можна смрт, неколку неодамнешни студии покажаа дека инаку здравите лица кои се закрепнале од короната имаат значително поголем ризик од долгорочни здравствени проблеми, вклучувајќи миокардитис (воспаление на срцевиот мускул), згрутчување на крвта и мозочен удар, во однос на вакцинираните лица.
Покрај тоа, најригорозниот безбедносен надзор во историјата на САД покажа дека вакцините против коронавирус се безбедни и ефикасни.
Хибриден имунитет
Меѓутоа, споменатата израелска студија фрла нова светлина врз нашето разбирање за силата на имунитетот што се добива со вакцинација по надминување на коронавирусот, односно таканаречениот хибриден имунитет.
Неколку студии покажаа значително зголемување на одговорите на антителата и Т-клетките на вакцината кај луѓе кои веќе се закрепнале од ковид-19.
Неколку студии покажаа дека имунолошкиот одговор кај луѓето кои прележале ковид-19, а потоа примиле само една доза вакцина „Фајзер“ или „АстраЗенека“, е поголем отколку кај луѓето кои примиле две дози вакцина и кои претходно не биле заразени со новиот коронавирус.
Затоа, неколку земји сега препорачуваат луѓето што го преживеале вирусот ковид-19 да земат една доза од вакцината. Меѓу тие земји се Франција, Италија и Германија.