СОПРУГОТ НА БРЕНА ПРОГОВОРИ ЗА ОДНОСОТ СО ЛЕДИ ДИ Секогаш сакаше да биде блиску до мене
Пред три дена беше годишнината од смртта на трагично загинатата принцеза Дијана Спенсер. Омилената „принцеза на срцето“ почина пред точно 24 години и остави празнина во срцата на многумина што ја познаваа.
На убавите спомени со леди Ди се присетил и поранешниот српски тенисер и сопруг на пејачката Лепа Брена, Боба Живојиновиќ (57).
„Фреш прес“ пренесува дека принцезата Дијана и Боба се запознале во 1987 година. Во тоа време, таа сѐ уште била во брак со принцот Чарлс, а Боба со невенчаната сопруга Зорица Накиќ, со која има син, Филип. Иако имала место во ВИП ложата, леди Дијана ги гледала тениските натпревари на Боба од обичните трибини за да биде што е можно поблиску до него.
Се присетил и на нивната прва средба.
– Една недела пред Вимблдон во 1987 година, се одржа хуманитарен натпревар под нејзино покровителство. Јас бев еден од учесниците, заедно со уште неколку познати тенисери. Тогаш ја запознав принцезата Дијана. Во првиот разговор, таа ме праша дали сум тенисерот кој има најсилен сервис. Доби потврден одговор. Следната година исто така се одржа егзибиционен натпревар, па таа повторно дојде. И повторно ме праша дали мојот сервис е сѐ уште добар. Тогаш почнавме да се дружиме и да се гледаме. Бевме блиски – раскажал Живојиновиќ, за кого нејзината присутност била голема чест.
– Голема работа е кога на натпревар ќе дојде да те бодри некој како принцезата Дијана. Бидејќи не се случуваше некој од кралското семејство да навива за тебе од трибините. Таа навиваше за мене. Бев исклучително горд што ме поддржуваа една таква жена. Таа го сакаше начинот на кој играм и начинот на кој се однесувам на теренот и сѐ што оди со тоа. Дијана беше прекрасна личност со која можев да разговарам за обични работи. Нејзината големина беше во таа нормална комуникација. Се изненадив колку е природна жена. Чест ми е што ја познавав. Нашите долги разговори се сведуваа на приказни за секојдневните работи и за нашите деца. Филип е на возраст на нејзиниот помал син Хари така што тие беа најчесто тема за разговор – се присетил Боба.