Пендаровски: Треба да се вакцинира државно-политичкиот врв и не може шарлатани на социјалните мрежи да зборуваат за чипирање

Во вечерашното интервју на МРТ, претседателот Стево Пендаровски истакна дека  сите од државно-политичко врв треба да се вакцинира.

Според него, сите кои имаат влијание во своите средини треба да се вакцинираат за да покажат дека граѓаните нема од што да се плашат.

– Не би сакал да бидам баш прв, зашто пред мене има здравствени работници кои директно работат со заразените и се разбира не би сакал ако првата квота е лимитирана, не би сакал да земам од нивната квота. Меѓутоа, во оној момент кога ќе се процени дека има доволно за сите здравствени работници, и оние кои се на првата линија на фронтот, се разбира јас сум тука да го направам со целото мое семејство – рече Пендаровски.

Вели дека недозволено е за една држава на социјалните мрежи и традиционалните медиуми да доминираат луѓе кои не се доктори и кои не се експерти за пандемијата.

– Тоа е исто како јас да ви кажувам за 5Г, ако сум јас претседател. 5Г, Бил Гејтс, сите тие комбинации и конспирации сте ги слушале, но јас не се разбирам од таа работа – вели Пендаровски.

Појаснува дека вакцините кои граѓаните ширум светот треба да ги примат се резултат на испитувања кои траат со месеци од страна на најголемите имови кои светот ги има.

– Не можете да го негирате тоа и да го ставите во еднаква позиција со некои шарлантани на социјалните мрежи кои не се доктори и ни кажуваат дека тоа е чипирање на луѓето. Одбивам таква дебата, во 21 век мораме да ја слушаме струката и науката – вели Пендаровски.