ВМРО-ДПМНЕ: Македонија стана Ломбардија на Балканот, одговорност мора да има!
Речиси шест месеци откако Република Македонија е зафатена со пандемијата предизвикана од вирусот ковид-19 а владата предводена од СДСМ и Заев се уште немаат ниту стратегија, ниту начин како да се справиме со истата, се вели во соопштението на ВМРО-ДПМНЕ.
„Иако од почетокот на пандемијата на прес-конференциите од страна на Министерството за здравство и од министерот Филипче слушаме дека државата добро се справува со вирусот и будно се следи ситуацијата, сепак секојдневните бројки од самиот почеток, па се до сега, покажуваат дека не само што владата нема никакви мерки за справување со кризата, туку има кренато раце од ситуацијата и граѓаните се оставени сами на себе“, се вели во соопштението.
ВМРО-ДПМНЕ потсетува дека првичните бројки на заболени од вирусот кои што се предвидуваа беа околу 2000 заболени, за денеска да сведочиме на фрапантна бројка од над 11000 заболени и за жал околу 500 починати.
„Република Македонија стана Ломбардија на Балканот. Поразителен факт е што владата нема стратегија, ниту пак некаков план за да ја сопре пандемијата, а по нивните тврдења, велат дека допрва доаѓа вториот бран на корона вирус во државата. И по неколку месеци борба со пандемијата, здравствените работници се уште укажуваат на тоа дека е потребна заштитна опрема која е неопходна за нивното секојдневно работење, односно во борбата со ковид вирусот, но Филипче и Заев тоа не го сметаат за приоритет. Тоа доволно кажува за неспособноста, неангажираноста и немањето ниту знаење, ниту идеја за претстојниот период со здравствената криза. Животот и здравјето на граѓаните кои што пред предвремените парлементарни избори беа најважно за СДСМ, сега одеднаш не се ниту во втор план“, се оценува во соопштението.
Партијата смета дека најголеми жртви на неработењето и манипулациите на СДСМ се здравствените работници кои од првиот ден се на првата борбена линија со ковид вирусот и граѓаните кои што за жал се оставени сами на себе. Во соопштението се заклучува:
„На сето ова мора да му дојде крај, а за последиците да се сноси одговорност!“