Белгија има највисока стапка на смртност поради „непотврдените случаи “

Анализите покажуваат дека Белгија е на прво место според бројот на потврдени смртни случаи од коронавирусот во однос на бројот на жители – 81,53 починати на 100.000.

Другите европски земји со голем број смртни случаи се далеку зад неа – Шпанија има 57.43 смртни случаи на 100.000 жители, Велика Британија 55,64 и Италија 54,4.

Американскиот универзитет „Џон Хопкинс“ изјави дека Белгија води со стапката на смртност од коронавирусот, која достигнува дури 16,2 проценти.

Следат Франција со 15,5, Италија со 14,3 и Велика Британија со 14,1 процент во однос на бројот на пациенти.

Во САД, која има најголем број смртни случаи од вирусот, стапката на морталитет е 5,9 проценти во однос на бројот на пациенти.

Шведска, која беше критикувана за благите мерки на социјално растојание, има стапка од 11,9, што е исто така пониско од Белгија.

Белгиските лекари ја објаснуваат оваа висока стапка на смртност со тоа што дури 40 проценти од смртните случаи од ковид-19 спаѓаат во категоријата „можни случаи“, што значи дека не се потврдени со тестови.

Многу други земји не вклучуваат вакви непотврдени смртни случаи во нивните записи.

„Фајненшл тајмс“ тврди дека, заради тоа, реалниот број на смртни случаи од коронавирусот во некои земји може да биде многу поголем од оној што е пријавен.

Во Белгија 9.334 луѓе починаа од ковид-19 до 27 мај, а заразени се 57.455 лица, пренесува „worldmeters“.