Се затвора фабриката во Штип во која има шест заразени работнички

Нови пет случаи на заразени со коронавирус во Штип, од кои четири се текстилни работнички од штипската конфекција. Во фабриката вкупниот број на заболени изнесува шест лица. Градоначалникот на Општина Штип, Благој Бочварски, денеска рече дека сопственикот на конфекцијата го информирал оти фабриката се затвора на една недела, а ако се покаже потреба и подолго.

– Јас разговарав со сопственикот на конфекцијата, но и со сите инспекциски служби и ме информираа дека таму е извршен инспекциски увид, надзор и контрола и е констатирано дека не се прекршени мерките за носење на заштитна опрема. Но, сопственикот ме информираше дека на негова иницијатива ќе ја затвори компанијата од недела дена, а ако има потреба и повеќе, со цел да се испитаат сите вработени – вели Бочварски.

Надлежните од Центарот за јавно здравје-Штип информираа дека денеска се земени девет брисеви од кои седум се поврзани со конфекцијата. Во тек е и епидемиолошка анкета за работничките од други конфекции, кои се превезувале во ист автобус со работничките од оваа штипска конфекција. Првично станува збор за повеќе од десет лица.

Ирина Бухова, директорка на Државниот здравствен и санитарен инспекторат, вели дека сите контакти на досега утврдените позитивни случаи ќе бидат ставени во изолација, но најавуви надзор и на автобусите на другите конфекции.

– Во однос на превозните средства ДСЗИ ќе изврши надзор во однос на хигиената во нив, обезбедени средства за дезинфекција на раце на лицата кои се превезуваат и динамиката на дезинфекција на превозните средства – вели Бухова.

Кристина Ампева од НВО „Гласен текстилец“, како најгласна организација за правата на текстилните работнички, препорачува во фабриките да се користи годишниот одмор за да се спречи состојбата да излезе од контрола. Вчера со препорака излезе и Центарот за јавно здравје во Штип да се држи дистанца, да се носи заштина опрема и редовно да се дезинфицираат автобусите и сите работни површини.