Македонија има машини и кадар за озонска терапија – дали ќе се применува кај пациентите заразени од коронавирусот?

Спектакуларни резултати во третманот на пациенти заболени од ковид-19 се постигнати во една болница во Ибица, Шпанија, со техника на озонирање на крвта на пациентите, јавуваат локални медиуми.

Болницата „Nuestra Señora del Rosario Polyclinica“ издаде соопштение, во кое тврди дека многу пациенти кои требало да бидат интубирани и приклучени на механичка вентилација, благодарејќи на озонската терапија, не само што се спасиле од респиратор, туку после неколку сесии нивната здравствена состојба се подобрила до тој степен што веќе немале потреба ни од кислородна поддршка.

Автохемиинфузиите со озон и лек и превенција

Озонската терапија ја подобрува оксигенизацијата на крвта на неризичен начин, со неинвазивна техника, без никакви контраиндикации или нуспојави кај пациентите. Озонот го подобрува имунитетот на пациентите и се користи во третманите кај други болести.

За едно такво искуство во борбата со ковид-19 јавува и една болница во Удине, Италија (Santa María della Misericordia University Hospital). Таму 36 пациенти со пневмонија и респираторни тешкотии се третирани со озонска терапија. Само 3 отсто од пациентите, споредено со вообичаените 15 отсто, се интубирани. Инфузиите од озон им помогнале на поголемиот дел од нив да се спасат од респиратор.

Италијанскиот пратеник Клаудио Педрацини раскажува за сопственото опоравување од ковид-19 со помош на озонската терапија. Покрај вообичаените симптоми и високата температура, вирусот ги нападнал и неговите бели дробови. Информиран за бенефититите од озонската терапија, пратеникот веднаш примил две големи автохемиинфузии за неколку дена. Оваа терапија се спроведува на тој начин што се зема извесно количество крв од пациентот, крвта се озонира во посебна машина и потоа таа се враќа во неговото тело преку инфузија. Заедно со инфузиите, пратеникот пиел озонизирана вода и правел вежби за дишење. Терапијата вродила со плод и тој целосно закрепнал.

Според некои информации, сега во 17 болници во Италија се користи озонска терапија во третманот на пациентите заболени од ковид-19. Д-р Антонио Гашпари, директор на Orbisphera.it, пишува за извештаите од првите две болници од 15 кои почнале со озонска терапија до 1 април, според протоколот на Научното друштво за оксиген озонска терапија (SIOOT). Според овие извештаи, кај 11 сериозно и многу сериозно болни пациенти имало брз и одлучен напредок. Само по пет сесии, од пет интубирани пациенти, еден е екстубиран, а кај другите има значително подобрување. Пациентите со полесни состојба се излечиле после неколку сесии со озонска терапија и се вратиле дома.

Во тек се клинички студии за оваа терапија и во Кина, а почетните резултати сведочат дека озонот е ефикасен за превензија и за контролирање на вирусот.

Можеме и во Македонија, штета нема

Повеќе од 100 години озонот се смета за природен убиец на вирусите и широко се користи за дезинфекција, стерилизација, деодоризација, детоксикација и оксигенизација. На овој линк можете да проследите една интересна форум-дебата, во која лекари од повеќе земји споделуваат искуства и мислења дали озонската тераопија може да помогне во лекувањето со ковид-19. Покрај присутниот скептицизам, на форумот сведочат и лекари кои и самите користат озонска терапија како превентива.

Озонската терапија, со автохемиинфузии, се прави и кај нас, но се уште не и кај болните од ковид-19. Плсунифо доби информација дека постои иницијатива таква терапија веднаш да почне да се спроведува и кај нас, како за болните пациенти, така и за медицинскиот персонал и за другите луѓе кои поради природата на својата професија се на удар на заразата. Според нашите информации, во Македонија постојат шест машини за спроведување ваква терапија, како и обучен кадар за нејзино изведување. Само една машина, на пример, е доволна да ги покрие потребите на Инфективната клиника во Скопје.

Останува да се види дали македонските здравствени власти ќе одобрат ваква терапија на болните од ковид-19, особено што за разлика од сите други терапии со лекови кои имаат и контраиндикации и нуспојави, озонската терапија е целосно безбедна и таа не може да им наштети на пациентите, ако се администрира според протоколите.