4 КАНДИДАТИ ЌЕ ДОБИЈАТ ПАТОКАЗ КАКО УВЕРУВАЊЕ ЗА ИДНО ЧЛЕНСТВО Европската Унија првпат става рокови на маса
Тоа не значи дека четирите земји однапред добиваат фиксен датум за влез во ЕУ. Станува збор за временски рамки за клучните фази од преговорите, а напредокот останува условен со спроведувањето на реформите. Македонија засега не е дел од оваа група земји.
Брисел подготвува нов пристап кон проширувањето со кој четирите најнапредни кандидати треба да добијат појасен пат до членството. Европската комисија работи на патокази за Црна Гора, Албанија, Украина и Молдавија, објави „Политико“, повикувајќи се на двајца високи претставници вклучени во подготовката на предлозите.
Најголемата новина не се само временските рамки. Иако Брисел одамна ги поддржува кандидатурите на четирите земји, патоказите првпат треба да им понудат уверување дека, доколку продолжат со клучните реформи, ќе бидат примени во Унијата.
Истовремено, земјите треба да добијат и ориентативни рокови за завршување на преговорите. Плановите ќе утврдат што точно се очекува од секој кандидат и приближно кога треба да бидат затворени одделните преговарачки кластери.
Тоа не значи дека четирите земји однапред добиваат фиксен датум за влез во ЕУ. Станува збор за временски рамки за клучните фази од преговорите, а напредокот останува условен со спроведувањето на реформите.
Патоказите треба да создадат обврски и за сегашните членки на Унијата, бидејќи нивната согласност е потребна за напредување низ пристапниот процес.
Македонија, Србија, Косово и Босна и Херцеговина засега нема да добијат вакви патокази. Според информациите на „Политико“, тие во оваа фаза не се вклучени во групата од четири кандидати за кои се подготвува новиот модел.
Брисел, сепак, паралелно разгледува поширок систем на постепена интеграција. Идејата е кандидатите да добиваат економски придобивки и пристап до заеднички европски проекти уште пред полноправното членство.
Се очекува Фон дер Лајен и еврокомесарката за проширување Марта Кос да предложат измени во внатрешните правила на ЕУ за воведување заштитни механизми што ќе спречат новите членки да ги блокираат важните политики или да се откажат од преземените обврски. Измените би можеле да вклучуваат итни клаузули и преодни периоди пред целосно да им бидат доделени сите права што произлегуваат од членството.
Ревизијата на претпристапната политика треба да биде претставена на 6 октомври, а европските лидери на самитот во Брисел на 15 октомври треба да разговараат за проширувањето и внатрешните реформи на Унијата.