📽️ ВОЗАЧ НА АВТОБУС СПРЕЧИ ОГРОМНА КАТАСТРОФА Соборен дрон со експлозив на аеродромот во Лајпциг

Возач на аеродромски автобус спречил можен терористички напад на аеродромот во Лајпциг, откако забележал дрон натоварен со експлозив како лета ниско и го оттурнал, по што леталото се урнало во близина. Според германските власти, само неколку секунди ја делеле земјата од потенцијално разорна експлозија.

Информацијата ја соопшти пратеникот во германскиот Бундестаг, Детлеф Зајф од Демохристијанската унија (CDU), кој изјави дека инцидентот се случил ноќта меѓу вторникот и средата на аеродромот Лајпциг/Хале.

– Возачот на автобусот го оттурна дронот додека леташе ниско. Потоа тој падна на земја. Неговата постапка беше исклучително храбра, но и многу опасна. Можно е токму со тоа да бил спречен планираниот напад – изјави Зајф, кој е и член на парламентарниот Комитет за внатрешни работи.

Германските обвинители соопштија дека дронот бил опремен со професионален експлозив и детонатор, поради што е отворена истрага за тероризам, бидејќи станува збор за напад што можел сериозно да ја загрози внатрешната и надворешната безбедност на Германија.

Министерот за внатрешни работи на германската покраина Саксонија, Армин Шустер, го пофали возачот за неговата присебност, но нагласи дека граѓаните не треба сами да интервенираат во вакви ситуации.

– Доволно е веднаш да ги известите надлежните служби – изјави Шустер за регионалниот сервис МДР.

Drohnen-Bomben-Alarm am Flughafen Leipzig/Halle

Am Flughafen Leipzig-Halle wurde eine Drohne mit Sprengstoff und Zünder sichergestellt. Die Drohne wurde in der Nähe eines ukrainischen Transportflugzeuges entdeckt und kurz vor Mitternacht mit einem Röntgengerät untersucht. Zu… pic.twitter.com/7D6r5qSP0c

— Hartwig (@Hartwig125393) August 5, 2026

Властите засега не го откриваат идентитетот на возачот, ниту пак соопштија од каде дошол дронот и како успеал да навлезе во строго обезбедениот дел од аеродромот.

Според германските медиуми, беспилотното летало било забележано во непосредна близина на неколку украински транспортни авиони Антонов Ан-124, меѓу најголемите товарни авиони во светот. Еден од нив, според информациите, бил натоварен со муниција, па доколку нападот успеел, последиците можеле да бидат катастрофални.

Поради сериозноста на случајот, германскиот Совет за национална безбедност одржал итна седница, а истрагата ја презело Сојузното државно обвинителство.

Со седницата претседавал германскиот канцелар Фридрих Мерц, кој и покрај тоа што е на одмор, бил во постојан контакт со министерот за внатрешни работи Александер Добринт и со останатите членови на федералната влада, објави Дојче веле.