🎥 УКРАИНА ИЗВЕДЕ ДОСЕГА НАЈЖЕСТОКИ НАПАДИ ВРЗ МОСКВА И КРИМ Горат рафинерија, воена фабрика, воздухопловна база…

Украина изведе еден од најмасовните и најсмелите напади врз руска територија од почетокот на војната, таргетирајќи нафтени постројки, воени цели и клучна инфраструктура во Московската област и на окупираниот Крим. Според украински извори, нападот бил координиран од Службата за безбедност на Украина (СБУ) во соработка со украинските одбранбени сили, а биле употребени голем број беспилотни летала.

Рафинерија во Москва меѓу главните цели

Украинските медиуми, повикувајќи се на СБУ, објавија дека биле погодени: московската нафтена рафинерија, пумпните станици „Солнечногорскаја“ и „Володарскаја“ и фабриката „Ангстрем“, која произведува полупроводници за рускиот воено-индустриски комплекс.

Дроновите го погодиле и истражувачко-производствениот комплекс „Елма“ во градот Зеленоград, околу 30 километри северозападно од центарот на Москва, по што избувнале пожари.

Според непотврдени информации, ова би можело да биде првпат украински сили успешно да погодат нафтена рафинерија во самиот главен град на Русија. На социјалните мрежи се појавија драматични снимки од пожари и интервенции на пожарникари во Москва.

Нападната и воената база Белбек на Крим

Паралелно со нападите во Русија, украинските сили извршиле удари и врз воената воздухопловна база Белбек на окупираниот Крим.

Според СБУ, погодени биле системот за противвоздушна одбрана „Панцир-С2“, радарската опрема за системот С-400, системите за управување со дронови „Орион“ и „Форпост“ и контролна кула и хангар на аеродромот.

Русија тврди дека соборила 556 дронови

Од руската страна пристигнаа тврдења дека станува збор за масовен напад со дронови, при што руското Министерство за одбрана соопшти дека биле соборени 556 беспилотни летала. Руските власти потврдија најмалку три жртви и повеќе повредени лица во различни региони на земјата.

Гувернерот на Московската област, Андреј Воробјов, соопшти дека една жена загинала во градот Химки и двајца мажи загинале во селото Погорелки. Најмалку 12 лица биле повредени, повеќето од нив во близина на влезот на московската рафинерија за нафта. Во нападите биле оштетени и станбени згради и објекти од критична инфраструктура.

Зеленски: Русија мора да сфати дека мора да ја прекине војната

„Украинските возвратни удари, што стигнаа до Московскиот регион – на 500 километри од границата, јасно покажуваат дека Русија мора да ја заврши војната што ја започна“, изјави денеска претседателот на Украина Володимир Зеленски.

„Нашиот одговор на долготрајната војна и на руските нападите врз нашите градови и заедници, е целосно оправдан. Овој пат, украинските возвратни мерки стигнаа до Московскиот регион и ние испраќаме јасна порака до Русите: нивната земја мора да ја заврши својата војна“, нагласи украинскиот претседател на Фејсбук.

„Концентрацијата на руската против-воздушна одбрана во Московскиот регион е највисока, но ние ја пробивме“ – нагласи Зеленски.

Енергетската инфраструктура станува главна мета

Последните напади покажуваат дека Украина сè повеќе се насочува кон руската енергетска и логистичка инфраструктура, со цел да го ослаби снабдувањето на руската воена машинерија. Нафтените постројки, складиштата за гориво и транспортните јазли во последните месеци стануваат редовна цел на украинските дронови.

Воедно, ваквите операции носат и силен психолошки ефект, бидејќи ја демонстрираат способноста на Украина да погодува цели длабоко во руската територија, вклучително и во близина на Москва.

Аналитичарите предупредуваат дека ваквите напади дополнително го зголемуваат ризикот од ескалација на конфликтот меѓу Русија и Украина.

A very large fire in the Eastern part of Moscow.

Locals report hearing an explosion before the fire. pic.twitter.com/VWEV6sdypX

— Anton Gerashchenko (@Gerashchenko_en) May 17, 2026

pic.twitter.com/zPGLyWAuOf

— 🪖MilitaryNewsUA🇺🇦 (@front_ukrainian) May 17, 2026