„СРАМ МИ Е ДА ВЕ СЛУШАМ“ Тошковски го обвини пратеникот Талески дека манипулира со гневот на граѓаните

Се срамам што ве слушам, не можам да поверувам дека сѐ уште се служите со лаги и со манипулации. Вака министерот за внатрешни работи Панче Тошковски му одговори на пратеникот од редовите на СДСМ, Миле Талески, кој упати критика за слабата одговорност во поглед на трагедијата во Кочани и кој побара од министерот да поднесе оставка.

– Знаете колку кривични пријави поднесе МВР и против колку луѓе за трагедијата во модуларната болница во Тетово? Јас ќе ви кажам: нула. Знаете колку кривични пријави поднесе МВР за трагедијата во Бугарија? Ќе ви кажам и тоа: нула. Знаете колку кривични пријави има за Ласкарци? Нула. Е сега, во овој предмет, МВР процесуираше кривични пријави за 34 физички лица и за 3 правни лица, меѓу кои има членови на ВМРО-ДПМНЕ, СДСМ, ДУИ, и ниеден од нив не е во оваа постапка затоа што е член или не е член на одредена политичка партија. За разлика од тоа што претходно овој орган бил должен да процесуира одредени надлежности кои ги има согласно законот, а не ги процесирал, за разлика од вас кој суди и манипулира со приказни, јас говорам со факти – рече Тошковски.

Талески возврати дека не е задоволен од одговорот.

– Цели 15 месеци сте министер, а уште не знаете каде се наоѓате. Избегнавте одговор на сите прашања кои ви ги поставив. Наместо да одговарате на прашања, вие ми држите политички памфлети. Вака може да се однесувате пред Унија на млади сили на ВМРО-ДПМНЕ, а не овде во Собранието. Знаеме дека ви е тешко и дека се наоѓате во катастрофална состојба. Моето прашање беше кои и зошто високи функционери од ОВР Кочани и СВР Штип не се повикани на разговор и не се бара одговорност од нив? Зошто не се опфатени во целата оваа постапка? Граѓаните и семејствата на настраданите бараат одговори на ова прашање – рече Талески.

Тошковски одговори:

– Ме обвинувате за селективен пристап, а сега не знам за што ме обвинувате. Кога се апсат луѓе од ВМРО-ДПМНЕ, тогаш прашувате како тие луѓе дошле до таа функција. Кога се апсат луѓе од СДСМ, тогаш зошто се апсат луѓе од СДСМ. Кој ќе ве разбере? Ни самите не знаете што сакате да прашате. Знам дека ви е тешко да се соочите со одговорноста, ама дојде време кога секој што згрешил ќе одговара, без разлика дали е градоначалник од ВМРО-ДПМНЕ или е градоначалник на СДСМ, дали е обезбедување на овој или на оној. Кажете ми пример од минатото кога обезбедувач на премиер вака бил истретиран? Немате одговор. Тоа е затоа што не постои таков пример – рече Тошковски.