РУСИЈА ГЛАСА НА ПРВИТЕ ПАРЛАМЕНТАРНИ ИЗБОРИ ПО ИНВАЗИЈАТА ВО УКРАИНА Путин ги претстави изборите како „референдум за војната“

Во Русија денеска започна тридневното гласање на парламентарните избори, првите избори за Државната дума откако Москва ја започна целосната инвазија врз Украина во февруари 2022 година. Претседателот Владимир Путин го претстави гласањето како показател за поддршката што ја има војната во руското општество и повика граѓаните да излезат на гласање.

За составот на Државната дума се избираат 450 пратеници. Половина од мандатите се распределуваат преку партиски листи, а другата половина преку едномандатни изборни единици. На изборите има околу 111 милиони регистрирани гласачи, а гласањето ќе трае до недела.

Гласање и на заземените украински територии

За првпат на парламентарните избори за Државната дума се гласа и во делови од украинските области Доњецк, Луганск, Запорожје и Херсон, кои се под руска окупација, како и на Крим и во Севастопол.

Русија воспостави 11 едномандатни изборни единици на окупираните украински територии. Киев го осудува гласањето како нелегално и не ги признава неговите резултати. Украинската Централна изборна комисија оцени дека организирањето на изборите е обид за дополнително интегрирање на окупираните територии во рускиот политички и правен систем.

Според анализата на Институтот за проучување на војната, во окупираните подрачја веќе се одржа и предвремено гласање за руските војници и за жителите на подрачјата во близина на фронтот. Организацијата наведува дека гласањето се одвива под силно безбедносно присуство, а окупациските власти преземаат мерки за зголемување на излезноста.

До 48 милиони Руси можат да гласаат онлајн

Изборите се одржуваат и преку систем за далечинско електронско гласање. Онлајн гласањето е достапно во 33 руски региони, а според руските власти потенцијално до 48,4 милиони граѓани можат да го користат овој начин на гласање.

Целта на тридневното гласање и електронската опција е, меѓу другото, да се олесни учеството и да се зголеми излезноста.

Изборите се одржуваат во политички систем во кој владејачката Единствена Русија има доминантна позиција. На гласачкото ливче има и други партии, меѓу кои Комунистичката партија, Либерално-демократската партија, Праведна Русија и Нови луѓе, но тие се дел од таканаречената „системска опозиција“.

 

Независната и антивоена опозиција има многу ограничено учество. Врховниот суд минатиот месец ја отстрани либералната партија Јаблоко од партиската листа, со образложение дека ги прекршила изборните правила, иако дел од нејзините кандидати продолжуваат да се кандидираат во одделни изборни единици. Дел од антивоените политичари се во затвор или ја напуштиле Русија.

За Путин изборите се изјаснување за војната

Во телевизиско обраќање пред почетокот на гласањето, Путин го поврза изборниот процес директно со војната во Украина.

– Вашиот избор и вашата волја повторно ќе покажат дека милиони луѓе стојат зад нашите војници и дека сме обединет народ поврзан со заеднички вредности, историско сеќавање и љубов кон татковината – рече Путин.

Тој порача дека гласањето ќе помогне да се обезбеди руската победа во Украина и да се покаже национална решителност пред надворешниот притисок. Кремљ, пак, тврди дека националното единство е особено важно поради, како што наведува, обидите на украинските разузнавачки служби и други непријатели да предизвикаат немири во Русија.

Изборите се одржуваат во период на зголемен притисок врз руската економија и општество. Истражувањата на јавното мислење покажуваат дека дел од граѓаните се сè позагрижени за последиците од војната врз нивниот секојдневен живот.

Украинските напади со беспилотни летала врз руски рафинерии, фабрики и логистички центри во текот на летото придонесоа за проблеми со снабдувањето со гориво во делови од земјата. Во исто време, руската економија се соочува со високи каматни стапки, недостиг на работна сила и западни санкции.

Гласањето завршува во недела, а првите резултати се очекуваат во недела навечер. Речиси целосни резултати би требало да има во понеделник.

Украински дронови го нарушуваат гласањето

Првиот ден од изборите беше проследен и со украински напади со беспилотни летала врз руска територија. Руската Централна изборна комисија соопшти дека во Краснодарскиот регион едно избирачко место било преместено на друга локација откако дрон ги оштетил прозорците на објектот.

Во окупираниот Луганск, 14 избирачки места привремено останале без електрична енергија по оштетување на енергетската инфраструктура. Во Сочи, изборни работници и гласачи биле принудени да се засолнат поради воздушна тревога.

Во меѓувреме, московскиот градоначалник Сергеј Собјанин соопшти дека во текот на ноќта повеќе од 350 украински дронови се движеле кон Москва и Московската област. Според него, повеќето биле уништени надвор од градот, додека 64 биле соборени при приближувањето кон Москва. Нападите предизвикале нарушувања во воздушниот сообраќај, вклучително и на главните московски аеродроми.